Осы аптада облыс әкімі Қанат Бозымбаев іссапармен ауданымызда болып, бірқатар мекемелерді аралады. Облыс басшысы алдымен Есік қаласының маңындағы Есік тарихи-мәдени қорық-музейіне ат басын бұрып, тарихи жәдігерлермен танысты.
Музей директоры Гүлмира Мұхтарова сонау сақ дәуірінен сыр шертетін мұражай залдарын көрсетіп, жәдігерлердің тарихымен таныстырды. Мекеме басшысының айтуынша, 2010 жылы ашылған музейге «Алтын адам» табылған орынды көру үшін әлемнің түпкір-түпкірінен туристер арнайы келеді.
Тарихи орынның жұмысына оң бағасын берген Қанат Алдабергенұлы Есік шатқалында орналасқан Есік көліне көтерілді. Мұндағы мақсат – стратегиялық маңызы бар нысанның жұмысымен танысу әрі мұндағы қордаланған мәселені шешу. Аудан әкімі Қуат Сұлтанғазиевтің сөзінше, Есік көлі аудан орталығы мен жақын орналасқан елді мекендерде тұратын 100 мыңнан астам тұрғынды ауызсумен қаматамасыз етуде. Сонымен қатар, 5500 гектар егістік алқабына тіршілік нәрін осы көлден алады. Қазіргі таңда суды тоқтататын құрылғылар ескіріп, жаңартуды қажет етеді. Бұл мәселе бойынша облыс басшысы тиісті шаралар қабылдау қажеттігін ескертті. Сондай-ақ бүгінде көлді сенімгерлік басқаруға алған су электр станциясы суды өзіне алуда. Бұл көлдегі судың жаз айына дейін тиісті мөлшерде жиналуына кері әсер етеді. Нәтижесінде, тұрғында тіршілік нәрінен таршылық көруі мүмкін. Қанат Бозымбаев су деңгейі көтерілгенше электр станциясына су жібермеуді тапсырып, бірінші кезекте қарапайым тұрғындар мен шаруаларды қамтамасыз ету керектігін айтты.
Облыс әкімі ауданымызда жүзеге асып жатқан ірі жобаның құрылысын көріп қайтты. Еңбекшіқазақ топтық су құбыры аудан орталығы мен жақын орналасқан 8 елді мекеннің тұрғындарын сапалы ауызсумен қамтамасыз етеді. Жобалық құны 4,5 млрд теңге болатын құрылыстың 90 пайызы аяқталған. 49 шақырым су құбыры жүргізілген. Құрылыс аяқталып, 2 су жинау қоймасы іске қосылса Есік қаласының маңындағы саяжайларға баратын судың деңгейі көтеріледі.
Қосымша 8 елді мекеннің ішкі су құбырларын жаңарту үшін жобалық-сметалық құжаттарын әзірлеуге қаражат бөлінген. «Ауыл – ел бесігі» бағдарламасы аясында екі жобаға бюджеттік өтінім берілген.
С.НҰРАДИН.
