2013 жылдан бері 30 шілде Дүниежүзілік адам саудасына қарсы күрес күні аталып өтіледі. Бұл күннің негізгі мақсаты – барлық адам баласының құқығын құрметтеу және қорғау, бейбітшілікті үндеу. Осы орайда жуырда аудандық әкімдіктің ұйымдастыруымен, Т.Молдағалиев атындағы аудандық мәдениет үйінің алаңында «Бала – тауар емес» тақырыбында акция өтті. Аталған шараға қала тұрғындары, патронатық отбасы және отбасылық үлгідегі балалар үйінің тәрбиешілері мен тәрбиеленушілері, «Жанұя» отбасын қорғау орталығы қатысты.

Іс-шара барысында ұйымдастырушылар тарапынан қатысушыларға бала саудасы туралы маңызды мәліметтер көрсетілген кітапшалар табысталды. Сондай-ақ келелі кеңестер берілді. Аудандық мәдениет үйінің қызметкерлері сахна төрінде әуезді әндері мен көркем билерін паш етті. Бүлдіршін балалар асфальтқа түрлі-түсті суреттер салды.

Аудан әкімдігі аппаратының бас маманы, комиссия хатшысы Алмагүл Дүйсебекова:

– Адам саудасы – адам құқықтарын өрескел бұзу болып табылады және халықаралық заңнамады қауіпті қылмыс болып есептеледі. Сарапшылардың дерегінше әлемде 2,5 миллионға жуық адам қазіргі қазіргі заманғы құл алып-сатушылардың қолында. Жыл сайын мыңдаған ерлер мен әйелдер және балалар өз елдерінде, шетелдерде адам саудалаушылардың қолына түседі.

Адам саудасы, ҚР қылмыстық кодексінің 128 және 133 баптарында «Адамдарды еңбекке және жыныстық қанау мақсатында саудалауға тыйым салады» деп көрсетілген. Осыған байланысты, адам саудасының құрбандары бар екендігін мойындау, осы дүниежүзілік қасірет туралы хабардар болу және құрбандардың құқықтарын қорғауға көмектесу үшін бағытталған іс-шараны ұйымдастырудамыз – деді.

Шара соңында асыр салған балалардың бәріне балмұздақ берілді.

Р.НАРХАНОВ.