Қазыналы қарттарымызды құрметтеу – қанымызға сіңген қасиет екені анық. Соған сай халықаралық қарттар күні мерекесіне орай Түрген ауылында округ әкімдігінің ұйымдастыруымен «Бекжан» мейрамханасында «Қарттарым, аман-саумысың» атты мерекелік шара ұйымдастырылды.
Ауыл үлкендері берекелі дастархан басында бас қосқан жиында округ әкімі Мақсат Аманғалиұлы арнайы сөз алып, қарттарды атаулы мерекемен құттықтап, ақ тілегін жеткізді. Сондай-ақ, ақса-қалдар алқасының төрағасы Талғат Смағұлов, аналар кеңесінің төрайымы Сәуле Сұлтанбекқызы сынды өзге де үлкендер сөз сөйлеп, келелі пікрлерін ортаға салып, баталарын берді.
Мерекені Түрген ауылдық мәдениет үйінің қызметкерлері мен аудан өнерпаздары ән мен күйге бөледі.
Есендос АСУБАЙ,
Түрген ауылдық мәдениет үйінің көркемдік жетекшісі.
