Аудандық партия филиалының төрағасы Б.Б.Рахимов арнайы брифинг өткізіп, атқарылған жұмыстары туралы есеп берді. Оның ішінде тұрғын үй құрылысы, инфрақұрылымдық жобалар мен әлеуметтік бастамалардың орындалуы ерекше атап өтілді.

«AMANAT» партиясы халыққа берген уәделерін орындап келеді. Біз тек жоспар құрумен шектелмейміз, олардың нақты жүзеге асырылуын қамтамасыз етеміз. Мысалы, биыл Ауданда 69,6 мың шаршы метр тұрғын үй салынды.

Сонымен қатар ауыз сумен қамтамасыз ету жұмыстары да қарқынды түрде жүріп жатыр. Биыл Бәйдібек би, Нұра, Ащыбұлақ, Қазақстан ауылдары таза ауыз суға қосылды. Аудан бойынша 108 шақырым су құбыры желілері жаңартылып, сапалы суға қолжетімділік едәуір артты.

«Су мәселесі – аудан үшін маңызды бағыттардың бірі. Біз тек биылдың өзінде 4 ауылдағы ауыз судың сапасын жақсарттық. Келесі жылдың соңына дейін тағы 8 ауылға таза ауыз су жеткізіледі.

Сонымен қатар, «Жайлы мектеп» ұлттық жобасы аясында төрт ауылда жаңа білім ошақтарының құрылысы жүріп жатыр.

Денсаулық сақтау саласында да маңызды нәтижелерге қол жеткізілді. Қызылшарық пен Тескенсу ауылдарында дәрігерлік амбулаториялар салынып, пайдалануға берілді. Сонымен қатар, Балтабай ауылындағы амбулатория күрделі жөндеуден өтті.

Бұқаралық спортты дамыту және өскелең ұрпақты спортқа баулу мақсатында Шелек ауылында денешынықтыру сауықтыру кешені қолданысқа берілді. Ащысай ауылында спорт кешенінің құрылысы аяқталып ел игілігіне жұмыс атқаруда.

Биыл 18 ауылда 57 шақырым ішкі жолдарға орташа жөндеу жүргізілді, ал 8 елді мекенде 60 шақырым жол ағымдағы жөндеуден өтті. Айта кету керек, «AMANAT» партиясының 2023-2027 жылдарға арналған Сайлауалды бағдарламасының ауданда 2024 жылға жоспарланған 32 іс-шарасының 24-і, яғни 75 %-ы толық орындалды. 8 орындалу барысында.