Қазақстанда жыл сайын қазан айының соңғы жексенбісінде әлеуметтік қызметкерлер күні аталып өтеді. Əлеуметтік сала – еліміздегі ең өзекті бағыттардың бірі. Бүгінде қоғамымызда қордаланған мәселелердің оң шешім табуына орасан үлес қосып жатқандар да осы – әлеуметтік сала қызметкерлері. Жабырқағандарға жан жылуын, көмек күткендерге қолұшын бергендер қашан да құрметке лайық.
23 қазанда аудан әкім Қ.Қашқымбаев әлеуметтік қорғау жүйесі қызметкерлерін кәсіби мерекесімен құттықтады. Шара шеңберінде ауданымыздың әлеуметтік қорғау жүйесін дамытуға үлес қосқан үздік мамандар құрмет грамотасымен марапатталды. – Әлеуметтік қызметкер болу үшін әуелі темірдей төзім керек. Қамқорлыққа зәру жандардың сұранысына жауап беру күш-жігерді талап етеді. Ол тек осы сала мамандарының ғана қолынан келетін іс. Қазіргі қиындықты елмен бірге еңсеруге күш сала беріңіздер, – деген аудан әкімі әлеуметтік қызметкерлердің алдағы жұмысына сәттілік тіледі.
Ерзат АСЫЛ
