Алматы облысының Алакөл ауданы мен ШҚО-ны түйістіріп тұрған тұсқа санитарлық бекет қойылды. Оның басты себебі, Шығыс Қазақстан облысындағы эпидемиологиялық жағдайдың қиындап кетуі. Бүгінде бұл қызыл аймақ ретінде танылған. Коронавирусты күнделікті жұқтырушылардың мөлшері 300-ден асты.
Алматы облысы Бас мемлекеттік санитарлық дәрігері Е.Сыдымановтың "Алматы облысының аумағында карантин режимі және кейбір шектеу шараларын енгізу туралы" жаңа қаулысында "Алакөл ауданының әкімі, Алматы облысының полиция Департаменті, Денсаулық сақтау басқармасы және басқа да жұмылдырылған қызметтер қамтамасыз етсін:
- Шығыс Қазақстан облысымен шекаралас облыс аумағына полиция, медицина қызметкерлері қатарынан Алматы облысына кіретін және шығатын азаматтарға байланыссыз термометрия және сауалнама жүргізу арқылы санитарлық бекет (601 км.) орнатылсын;
- бекеттерге жұмылдырылған қызметкерлер жеке гигиенаны сақтау үшін қажетті жағдайлармен, жеке қорғану құралдарымен (бір рет қолданылатын бетперделер, қолғаптар, қорғаныш көзілдіріктер және/немесе экрандар), тамақтану және жылыту пунктімен қамтамасыз етілсін" делінген болатын.
Бүгінде тәртіп сақшылары мен санитарлар облысқа кірген, шыққан азаматтардың дене қызуын өлшеп, жеке мәліметін жазып алады. Сондай-ақ 6 қарашадан бастап өңірде санитария талаптары күшейтілді.
Облыстық бас санитария дәрігерінің жаңа қаулысына сәйкес, 2000 шаршы метрден асатын сауда-ойын-сауық орталықтарының жұмысы тоқтады. Қоғамдық тамақтану орыны, мейрамхана мен дәмханалар да жабылды. 65 жастан асқандарға көшеге шығуға тыйым салынып, қоғамдық орындарда бетперде тағып жүру міндеттелді.
