Жақында аудан әкімі Бинәлі Ысқақ мәдениет қызметкерлерінің күнінде облыстан жүлделі оралған ауданымыздың бірқатар мәдениет саласының қызметкерлерін қабылдады.

Ауданымыздың рухани кемелденуіне, жастардың бойына тарихымызды, мәдениетіміз бен салт-дәстүрімізді сіңіруде жетекші рөл атқарып жүрген мәдениет саласы қызметкерлерін төл мерекелерімен құттықтаған Бинәлі Әбдіқапасұлы ризашылы-ғын білдірді:

– Бүгінде ауданымыз барлық салаларда үлкен белестерді бағындырып отыр. Десек те, мәдениет саласында ауданымыз соңғы рет 2013 жылы үлкен жетістікке жеткен еді. Биыл облыста еңбектеріңіз еленіп, «Үздік облыстық мәдениет мекемесі» номинациясы «Ұста Дәркембай атындағы қолөнер мұражайына» бұйырды. Есік археологиялық-өлкетану мұражайы «Үздік мұражай» атанды. «Үздік мәдениет қызметкері» де біздің ауданымыздан шықты. Мәдениет және спорт министрінің Алғыс хаты біздің кітапханашымызға табысталды. Сондай-ақ, айта кету керек, күні кеше ғана Қаракемер мәдениет үйі республикамыздағы «Үздік ауылдық мәдениет үйі» атағын иеленді. Бұл – біз үшін үлкен жетістік әрі мақстаныш. Сіздердің еңбектеріңіздің жемісі – деген Бинәлі Әбдіқапасұлы ауданымыздағы мәдениет мекемелеріне көңіл бөлінетіндігін жеткізді. Қазірдің өзінде Т.Молдағалиев атындағы аудандық мәдениет үйін күрделі жөндеуден өткізу үшін жобалық-сметалық құжаттары әзірленуде. Аудандық кітапхананы жаңа ғимаратқа көшіру мәселесі де қарастырылып жатыр. Осындай жақсылықтарды жеткізген аудан басшысы Дәулет Шоқпаров, Долкунжан Розахунов, Нарима Тойжанова, Галина Свининниковаға өзінің Алғыс хатын табыстап, гүл шоқтарын ұсынды. Жұмыстарына сәттілік тілеп, мәдениет пен өнердің биік белестерін бағындыруға тілектестік білдірді.

Сардарбек НҰРАДИН