Өткен аптада аудандық мәслихатпен бекітілген жұмыс кестесіне сәйкес аудандық мәслихат хатшысы Бекет Ахметов бастаған аудандық және облыстық мәслихат депутаттары Малыбай, Бартоғай, Масақ, Асы, Қорам, Қаражота, Шелек, Қаратұрық, Тескенсу, Қазақстан ауылдық округтерін аралады. Сапар барысында округ активімен, жергілікті қауымдастық өкілдерімен, белсенді азаматтармен, қоғамдық ұйымдармен санитарлық талаптарды сақтай отырып кездесу өткізілді.

Кездесулер барысында Мемлекет басшысы Қасым-Жомарт Тоқаевтың  «Халық бірлігі және жүйелі реформалар – ел өркендеуінің берік негізі» атты Жолдауындағы 7 негізгі бағдар мен 5 бастама талқыланды. Осы бағыттағы мақсат-міндеттер, «Nur Otan» партиясының аудандық филиалының сайлауалды бағдарламасына сәйкес Еңбекшіқазақ ауданының 2021-2025 жылдарға арналған даму жоспарын іске асыру Жол картасының индикаторларының орындалуы жайында сөз қозғалды. Сонымен қатар, Еңбекшіқазақ аудандық мәслихатының VІІ шақырылымының 2021 жылдың 8 айында атқарған жұмыстар көпшіліктің назарына ұсынылды.

Мемлекет басшысының Жолдауы аясында аудан аумағындағы жоспарлы жұмыстардың негізгілеріне тоқталған мәслихат хатшысы Бекет Ахме-тов бірлік пен нәтижелі еңбек дамуға бастайтынын айтты:

– Біздің бағытымыз белгілі, мақсатымыз – айқын. Ең бастысы, сол мақсатқа жету үшін не істеу қажеттігін жақсы білеміз. Нақты жоспар жасап, соны жүзеге асырып жатырмыз. Еңбекшіқазақ аудандық мәслихаттың VII шақырылым депутаттарының жұмысы жергілікті атқарушы органдармен бірлесе «Nur Otan» партиясының аудандық филиалының сайлауалды бағдарламасы аясында дайындалған Еңбекшіқазақ ауданының 2021-2025 жылдарға арналған даму жоспарындағы міндеттерге нәтижелі қол жеткізуге негізделіп отыр. Аталған бағдарлама негі-зінде бекітілген Жол картасында 2021 жылы  7 бағыт бойынша 60 іс-шара жоспарланған.

Алты алаштың дарасы Ахмет Байтұрсынұлы «Ұлт жұмысы үлкен жұмыс. Басқадан кем болмас үшін біз білімді, бай һәм күшті болуымыз керек. Білімді болуға оқу керек. Бай болуға күш керек. Күшті болуға бірлік керек. Осы керектердің жолында жұмыс істеу керек!» деген еді, қазіргідей жаңарған заманда еліміздің әрбір азаматы жоғары білім мен табанды еңбектің нәтижесінде ғана биік белестерден көрінетіні анық. Мемлекетіміздің дамуы мен халқымыздың амандығы – бағытты, жүйелі әрі табанды шараларға және біздің тұрақтылығымыздың тұғыры – бірлігімізге байланысты – деді Бекет Төлегенұлы.

Сонымен қатар, қатысушылардың тарапынан білім және денсаулық сақтау салаларындағы көрсетілетін қызметтің сапасы, материалдық-техникалық базасын нығайту, мамандар тапшылығы, бейімделген және ескірген, күрделі жөндеуді қажет ететін мектептердің, денсаулық сақтау нысандарының жағдайы, балалардың қауіпсіздігі, таза ауыз сумен қамтамасыз ету, жайылымдық жерлер, сапалы жол құрылысы, Асы жайлауының экологиялық жағдайы және оны сақтап қалу, ветеринария қызметінің сапасын арттыру,ауыл шаруашылығы саласында ішкі ирригациялық желілерді жөндеуден өткізу, көгілдір отынмен қамтамасыз ету сияқты мәселелер көтеріліп, сұрақтар қойылып, ұсыныстар айтылды.

Депутаттар тарапынан заң аясында түсіндіру жұмыстары жүргізіліп, тұрғындардың сұрақтарына нақты жауаптар берілді және барлық өзекті мәселелер назарға алынып, алдағы уақытта тұрақты жұмыс тобымен білім беру, денсаулық сақтау нысандарының жағдайына және 2021 жылы іске асырылып жатқан жол жөндеу, құрылыс жұмыстары мен өзге де тұрғындар тарапынан көтерілген мәселелер бойынша талдау жасалынып, тиісті құзырлы органға депутаттық сауалдар жолданып, есептері күн тәртібінде қарастырылатыны айтылды.

С.НҰРАДИН.