Аудандық мәслихат хатшысы Бекет Ахметов, «AMANAT» партиясы аудандық филиалының атқарушы хатшысы Қуат Байғоджаев «Еңбекшіқазақ» газетінің ұжымымен кездесу өткізіп, маңызды саяси науқан – референдум бойынша ой бөлісті.

Қазіргі таңда бұқаралық ақпарат құралдарының әлеуметтік трансформациялау рөлі өте жоғары. Жүздесуде Қуат Байғоджаев газет ұжымының ұзақ жылдардан бері мемлекеттің саяси бастамаларына ақпараттық қолдау көрсетіп келе жатқандығына алғыс айтып, сөз тізгінін мәслихат хатшысы Бекет Төлегенұлына берді. Өз кезегінде Бекет Ахметов конституциялық Референдумның мәні мен маңызына тоқталды. Бұл саяси қадамның ел дамуына тыңнан серпін бертіндігін тілге тиек етті.

– Мемлекет басшысының Парламенттің рөлін күшейту және суперпрезиденттік басқару формасынан бас тарту туралы ұсынысы ерекше назар мен мақұлдауға лайық. Президенттің шамадан тыс өкілеттіктерінен бас тарту шын мәнінде елдегі саяси жаңғыртудың қайтымсыздығын қамтамасыз ететін маңызды фактор болатынына Президентпен келісу керек, өйткені ұсынылған бастамалар кейбір құзіретті түбегейлі өзгертеді және қазақстандық қоғамды одан әрі демократияландырудың берік іргетасын қалыптастырады, – деді мәслихат хатшысы. 

Кездесуде газеттің бас редекторы Хайролла Ахметжанов саяси өзгерістің салмағын сөз етіп, Ата Заңға енетін өзгерістер мен толықтыруларда мемлекет құраушы ұлттың құқықтық мәртебесін айқындау жайлы ұсынысын жеткізді. Ұжым мүшелері референдумның маңыздылығын, Жаңа Қазақстан құру жолында жасалып жатқан іс-шараларды нақты қолдайтынын айтты.

Е.АСЫЛ.