«Қазақстан азаматтары ҚР Конституциясына өзгерістер мен толықтырулар енгізу жөніндегі референдумға шетелден де қатыса алады. Бұл туралы ҚР сыртқы істер министрлігінің баспасөз қызметі мәлім етті», – деп хабарлайды ҚазАқпарат.
«ҚР Президентінің биылғы 5 мамырдағы №888 Жарлығына сәйкес 5 маусымда Қазақстан Республикасының Конституциясына өзгерістер мен толықтырулар енгізу бойынша жалпыұлттық референдум өтеді. Қазақстанның шетелдегі мекемелерінің жанынан 52 шет мемлекетте 65 учаскелік комиссия құрылды», – делінген хабарламада.Дауыс беруге қатысу үшін белсенді сайлау құқығы бар, тиісті шет мемлекетте тұратын немесе жеке, қызметтік, іскерлік және туристік мақсатпен жүрген және ҚР азаматының жарамды паспорты бар Қазақстан Республикасының азаматтары учаскелік комиссия құрылған Қазақстанның дипломатиялық өкілдігіне жүгіне алады.
5 маусым күні өтетін Республика көлеміндегі жалпыхалықтық референдум – ел болашағы үшін аса маңызды іс-шара. Әрбір қазақстандықтың дауысы ескерілетін ҚР Конституциясына өзгерістер мен толықтырулар енгізу жөніндегі референдумда Ата заңның үштен бір бөлігі өзгеруі мүмкін. Ел Президенті Қасым-Жомарт Кемелұлының «халық үніне құлақ асатын мемлекет» концепциясы негізінде өтетін бұл шара – «Жаңа Қазақстан» құрудағы негізі қадамдардың бірі.
mezet.kz
