29 сәуірде Қазақстан халқы Ассамблеясының ХХХІ сессиясында сөйлеген сөзінде Президент Қасым-Жомарт Тоқаев Қазақстан Республикасының Конституциясына түзетулер енгізу бойынша жалпыреспубликалық референдум өткізуді ұсынды. Мемлекет басшысы Қасым-Жомарт Кемелұлының 5 маусымда болатын жалпыұлттық референдум жайлы шешімі мемлекеттің әрбір азаматына үлкен жауапкершілік жүктеп қана қоймай, алдағы күнге маңызды қадам жасауға жетелейді. Иә, елімізде осындай үлкен саяси науқан өткізілу жоспарлануда. Араға 27 жыл салып конституциялық референдум өткізгелі жатырмыз. Қазір осы референдум өткізу туралы барлық өңірде республикалық штабтың өкілдері өздерінің жұмыстарын жүргізуде.

Қ.Тоқаев Президент болып сайланғанда өзінің бағдарламасының негізгі өзегі етіп үш мәселені көтерді. Бірінші, халықтың әл-ауқатын көтеру, екінші, әділет, үшінші, даму. Қазіргі болып жатқан реформалардың бәрі де Президентіміздің сайлауалды бағдарламаларының логикалық жалғасы деп қарастыру керек.

Конституциялық реформа – қоғамды демократияландырудың шынайы қадамы. Бұл референдум суперпрезиденттік модельден президенттік республикаға максималды көшу, Парламенттің рөлін күшейту, халықтың елді басқаруға қатысуын, азаматтардың құқықтарын қорғаудағы конституциялық тетіктерін күшейту сияқты іргелі өзгерістерге жол ашады.

Осы конституциялық референдумды өткізуге санаулы күндер қалды. Ел тарихындағы елеулі оқиғаға бейжай қарамай, белсенді қатысу – әрбір азаматтың басты борышы. Себебі бұл – бүгінгі Қазақстанның ғана емес, келешек ұрпақтың тағдырына тікелей әсер ететін сәт. Сондықтан ел үшін жаны ашитын әр азамат осы референдумға қатысып, өз таңдауын жасауы қажет.

Серік НАДЫРБАЕВ,

аудандық қоғамдық кеңестің төрағасы.