Мен, Әділхан Азамат Әділханұлы, 1993 жылы 11 қаңтарда Алматы қаласында дүниеге келдім. Білімім – жоғары. 2011-2015 жылдары Абай атындағы Қазақ ұлттық педагогикалық университетін құқықтану мамандығы бойынша тәмамдадым. Еңбек жолын 2015 жылы 20 желтоқсанда «АС-Сапа Курылыс» ЖШС-де заңгер болып бастадым. 2017 жылы 20 желтоқсанда Қазақстан ауылдық округ әкімі аппаратының бас маманы болып жұмысқа қабылданып, 2018 жылы 3 қазанда Есік қаласы әкімі аппаратының бас маманы болып ауыстым.  Еңбекшіқазақ аудандық ішкі саясат, мәдениет, тілдерді дамыту және спорт бөлімінде бас маман қызметін атқардым. Қазіргі таңда Қаракемер ауылдық округі әкімінің орынбасарымын.  

Құрметті Шелек ауылдық округінің сайлаушылары!

Ауыл – еліміздің жүрегі. Сондықтан ауылды көркейтіп, әлеуетін арттыру – менің басты мақсатым. Мемлекет басшысы Қ.Тоқаев ауылдарды гүлдендіруге, сондағы тұрғындардың тұрмыс сапасын жақсартып, әл-ауқатын арттыруға барлық мүмкіндіктерді жасауда. Түрлі мемлекеттік бағдарламалар қабылданып, ірі жобалар жүзеге асырылуда. Осындай бағдарламаларды тиімді жүзеге асыру, ауылдың әлеуетін пайдалана отырып, дамуға жол ашу – менің сайлауалды бағдарламамның негізі.

Сайлауалды бағдарламамда төмендегідей бағыттарға басымдық беріп, жұмыс атқаратын боламыз:

– Халықтың әл-ауқатын көтеру бағытында жұмыс жасап, әлеуметтік мәселелерді үнемі назарда ұстаймын;

– Адамның басты капиталы – білім. Осы тұрғыда округтегі білім беру ұйымдарымен үнемі байланыста болып, оқушылардың түрлі деңгейдегі байқауларға қатысуларына жағдай жасаймын;

– Округ тұрғындарын рухани қолдау бағытында ауыл кітапханасы мен мәдениет үйі жұмыстарының жандануын назарда ұстай отырып, тиісінше қолдау көрсетемін;

– Аз қамтылған, көпбалалы отбасыларды, мүмкіндігі шектеулі жандарды назардан тыс қалдырмай, қамқорлық жасаймын;

– Округтің санитарлық тазалығын үнемі бақылауда ұстап, көгалдандыру мен абаттандыруға жұмыс жасаймын;

– Болашақ жас ұрпақтың еншісінде. Демек, ауыл жастарының спортпен шұғылданып, түрлі жарыстарға қатысуларына қолдау көрсетемін. Жастардың ауылда тұрақтауына жағдай жасай отырып, округ тұрғындарының санын арттыруға күш саламын;

– Округтегі кәсіпкерлер, шаруа қожалықтарымен тығыз байланыста болып, ауылдың мәдени, қоғамдық жұмыстарына белсенді араласуларын ұйымдастырамын;

– Ауылдағы  саяси  ахуалдың  тұрақты  болуын  басты  назарда  ұстау,  саяси ахуалдың  тұрақты болуы үшін әрдайым зерттеулер жасап  талдау  жүргізіп отыру, саяси  ахуалдың тұрақты болуы және әлеуметтік мәселелердің оң шешімін табу үшін  қоғамдастық, ардегерлер  кеңесі, жастар ұйымы жұмысының белсенділігін арттырамын;

– Ауылда жұмыссыздықты болдырмау, халықты нәтижелі жұмыспен қамту мақсатында тұрғындарды жеңілдетілген несиелер алып, түрлі мемлекеттік бағдарламаларға қатысуға, өз кәсібін ашып, жұмыс жасауға заңдық тұрғыда көмектер көрсететін боламыз;

–  Жергілікті мемлекеттік басқару және өзін-өзі басқару заңына сәйкес 2018 жылдан бастап ауылдық бюджет көзделген. Тиісті біліктілік курстарынан өткен, сапалық құрамы жоғары мамандарды даярлай отырып, кәсіби аппарат құру, барлық мүмкіншіліктерді қарастырып салық базасын кеңейту, түбегейлі зерттеліп, жан-жақты талданғаннан кейін ауыл бюджетін сапалы жоспарлаймыз;

– Шағын және орта бизнеспен айналысуға ауыл тұрғындарын көптеп тарту, ауыл шаруашылығына басым бағыт беру, ауыл шаруашылық дақылдарын әртараптандыру, өндіріске жаңа сұрыптарды енгізе отырып, жоғары өнімдер алуға қол жеткіземіз.