Кешегі Атырау қаласында өткен Ұлттық құрылтайда Президент Қасым-Жомат Тоқаев күн тәртібінде белең алып отырған бірқатар келелі мәселелерді шешудің оң бағыттарын айқындап берді. Мәселен, “қазақ тілінің қолдану аясын кеңейту мемлекеттік саясаттың басты бағыты болып қала беретінін” және “ешкімді мәжбүрлемей, күнделікті қажеттілікті арттыру арқылы нығайта береміз” дегенді қадап айтты. Сонымен қатар рухани дамудың қайнар көзі - кітап десек, Президенттің назарынан бұл мәселе де тысқары қалған жоқ.

Өз кезінде қара сөзден қамшы өрген сөз зергері Ғабит Мүсірепов: «Кітап дегеніміз – алдыңғы ұрпақтың кейінгі ұрпаққа қалдырған рухани өсиеті. Кітап оқудан тыйылсақ, ой ойлаудан да тыйылар едік» – деген еді. Сондай-ақ неміс жазушысы Лион Фейхтвангердің: «Көркем әдебиет жас баланы саяси қайраткерге дейін тәрбиелейді» – деген сөзінде де үлкен салмақты ой жатқанын аңғару қиын емес.
Осы орайда Президент жиында Ұлттық құрылтай мүшелерінің “Ұлттық кітап күнін” белгілеу ұсынысына да қолдау білдіріп, еліміздің бас қалалары - Алматы мен Астанада тәулік бойы жұмыс істейтін кітапхана ашылатынын мәлімдеді. Бұл “Адамды адам еткен – кітап, адамзат еткен – кітапхана” деп аңыз әрі абыз жазушы Әбіш Кекілбаевтың босқа айтпағанының толық дәлелі.

«AMANAT» партиясы аудандық филиал төрағасы Б.Рахимов.