Мемлекеттік қызмет — ел дамуы мен тұрақтылығының тірегі, азаматтардың әл-ауқатын арттыруға бағытталған жүйелі басқару саласы. Бүгінгі күні Мемлекет басшысының тапсырмасына сәйкес Қазақстан Республикасының Мемлекеттік қызмет істері агенттігімен жүргізіліп жатқан реформалар нәтижесінде мемлекеттік қызметке қабылдау жүйесі айтарлықтай жаңғыртуда. Оның айқын көрінісі — цифрлық форматта енгізілген «Е-Qyzmet» электронды платформасы мен жаңартылған меритократиялық конкурс жүйесі.

Мен осы жүйенің тиімділігін тікелей өз тәжірибем арқылы көрдім. Бұған дейін мемлекеттік құрылымда жұмыс істемеген азамат ретінде, ашық әрі әділ жүйе арқылы мемлекеттік қызметке қабылдандым.

Мемлекеттік қызметке өтініш беру процесі «Е-Qyzmet» платформасында толық цифрлық форматта жүзеге асады. Бұл — үміткерлер үшін барынша ыңғайлы әрі ашық алаң. Платформа үміткердің құжаттарын  автоматты түрде тексереді: жоғары оқу орны, диплом, жұмыс тәжірибесі секілді мәліметтер тиісті базалармен салыстырылады.

Өтініш беру ЭЦҚ арқылы расталады, ал жүйе үміткерге жеке ID-нөмір береді. Осылайша, әрбір қатысушы анонимді түрде тіркеліп, оның жеке деректері тестілеу мен бағалау кезінде көрсетілмейді. Бұл тәсіл — адам факторының ықпалын азайтып, конкурс процесінің әділдігін қамтамасыз етеді.

Екінші кезең — онлайн тестілеу. Үміткерлер Қазақстан Республикасының Конституциясы, «Қазақстан Республикасының мемлекеттік қызметі туралы» Заң, «Сыбайлас жемқорлыққа қарсы іс-қимыл туралы» Заң және Қазақстан Республикасы мемлекеттік қызметшілерінің әдеп кодексі бойынша сұрақтарға жауап береді. Тестілеу процесі прокторинг жүйесі арқылы бақыланып, ереже бұзуға жол бермейді.

Тестілеуден сәтті өткен үміткерлер келесі кезеңге – мәтіндік және сандық аналитикалық тапсырмаларға жіберіледі. Бұл кезеңде теориялық біліммен қатар, үміткердің логикалық ойлау, қорытынды жасау және нақты шешім қабылдау қабілеті сараланады. Әр қатысушыға 50 минут уақыт беріледі. Бұл – үміткердің жинақы әрі тиімді жұмыс істеу қабілетін көрсетудің мүмкіндігі.

Жоғары балл жинаған үміткерлер видеосұхбат кезеңіне шақырылады. Бұл – дәстүрлі комиссия алдындағы сұхбаттан өзгеше. Сұрақтар нақты жағдайлар негізінде қойылып, кәсіби біліктілікпен қатар, үміткердің жеке қасиеттері мен сындарлы шешім қабылдау дағдылары бағаланады. Комиссия мүшелері сұхбатты тиімді әрі ықшам өткізуге тырысады.

Барлық кезеңдерден өткен үміткерлердің нәтижесі толығымен 

қамтамасыз ететін басты фактор. Қабылданған шешім жүйеде тіркелген баллдарға сүйенеді, ал конкурс нәтижесі электронды форматта үміткердің жеке кабинеті арқылы хабарланады.

Менің жағдайымда да, аты-жөнімді ешкім танымаған, жеке қатынас болмаған жағдайда, тек өз білімім мен кәсіби дайындық деңгейім арқылы мемлекеттік қызметке қабылдандым. Бұл – жаңа форматтағы конкурс жүйесінің шынайы тиімділігін көрсетеді.

Бүгінгі таңда мемлекеттік қызметке кіру – ашық, әділ және заманауи процесс. Мемлекеттік қызметке қабылдау енді тек қабілет пен білімге негізделеді. Егер сізде қажетті білім, ынта және кәсіби дайындық болса – өз күшіңізбен мемлекеттік жүйеде өз орныңызды таба аласыз.

«Е-Qyzmet» жүйесі — білікті жастарға жол ашатын жаңа буын алаңы. Ол — нақты мүмкіндіктер, таза бәсеке және әділеттілік негізіндегі болашақтың платформасы.

ҚР МҚІА Алматы облысы бойынша департаментінің

Мемлекеттік қызмет басқармасының бас маманы

 З.К. Акижанова