Шелек ауылында праймериздің пікірталас додасы өтті. 2 кезеңнен тұрған пікір-сайыста мәжіліс пен барлық деңгейдегі мәслихаттар депутаттығына кандидат 8 үміткер бәсекеге түсті. Алғашқы кезеңде бақ сынаушылар өзекті мәселелерді шешуге бағытталған бағдарламаларын таныстырса, екінші бөлімде сұрақ-жауап арқылы ой алмасты.
Жария пікір-сайысқа Еңбекшіқазақ ауданының әкімі "Nur Otan" партиясы аудандық филиал төрағасы Қуанышбек Қалиұлы Қашқымбаев арнайы қатысып: «Праймериз – бәсекелестік күрес негізінде нақты және мықты көшбасшыларды анықтау. Бізде бүгін 99 үміткер додаға түсуде. Қатысуға ниет білдірген азаматтардың қатарында 23,2%-ы әйелдер, 35 жасқа дейінгі 18,2%-ы жастар, үміткерлердің 45,5%-ы 35 жас пен 50 жасқа дейінгілерді құрап отыр. Үміткерлер қатарын ауыл шаруа-шылығы, білім, денсаулық сақтау саласы, кәсіпкерлер мен ауданымыздың қоғам белсен-ділері, түрлі сала мамандары құрайды. 7 қыркүйектен бастау алған үгіт-насихат жұмыстарын әр кандидат өзінің жеке кестесіне сәйкес партияластарымен әртүрлі форматта 1673 кездесу өткізді. Осы сайлау науқанына белсенділік танытып, өз таңдауларыңызды жасауға шақырамын. Мен де өз даусымды мобильді қосымша арқылы беретін боламын», ‒ дей келе, «Ерлік пен бірлік жеңіске жеткізетінін» атап өтіп, саяси бәйгеде барша қатысушылардың ісіне сәттілік тіледі.
Қарапайым адамдарға беймәлім «праймериз» термині бізге ағылшын тілінен енген. Қазақша баламасы ‒ сайлау, алдын-ала іріктеу дегенді білдіреді. Өркениетті елдерге XIX ғасырда еніп кеткен бұл үрдісті «Nur Otan» партиясы жіті зерттей отырып, қазақ елінің саяси аренасы тәжірибесіне енгізіп, партияішілік іріктеу өткізудің ережелерін бекітіп, сайлауға түсуге ниетті кандидаттарды іріктеуде осы әдісті қолдануға бел буып отыр. Естеріңізге салатын болсақ, осы жылдың 5-маусымында Партия Төрағасы Н.Ә.Назарбаев 17 тамыздан 3 қазанға дейінгі аралықта партияішілік таңдау – праймериз өткізу туралы Қаулыға қол қойған болатын.
Дода кандидаттарды ұсыну және тіркеу, кандидаттарды үгітке даярлау, үгіт жұмысы, дауыс беруді өткізу, тізімдерді дайындау секілді бес кезеңнен тұрады.
Пікір-сайыс жиынына аудандық мәслихат хатшысы Б.Ахметов, партияның аудандық филиалы төрағасының бірінші орынбасары Қ.Байғоджаев қатысты.
Сонымен, Қазақстанның саяси тарихында тұңғыш рет көшбасшы партия тізімі ашық іріктеуден өткен адамдардан құралатын болады. Айта өтейік, праймериз қатысушыларына онлайн дауыс беру 1-3 қазан аралығында өтеді. Осылайша, праймериз мобильді қосымша және арнайы веб-портал арқылы электронды дауыс беру нәтижесімен түйінделетін болады. Ал пікірталас-дебаттар газетіміздің 38-ші санында жарияланған кесте бойынша жалғасуда.
Ілия СҰЛТАН
