Бүгін «Nur Otan» партиясы аудандық филиалының партиялық кадр резервінің мүшелері Малыбай бастауыш партия ұйымының өкілдерімен кездесіп, Президенттің «Жаңа жағдайдағы Қазақстан: іс-қимыл кезеңі» атты Жолдауы мен Ұлт жоспарын жүзеге асырудағы 100 нақты қадамды талқылады.
Елімізді жаңа мүмкіндіктерге жетелейтін бағдарламаларды қамтыған аудандық мәслихат депутаты Айдарбек Даутқұлов озық мемлекеттердің қатарына қосылудағы Ұлт жоспарының атқаратын рөліне тоқталды:
– Елбасы, Тұңғыш Президентіміз Н.Назарбаев Қазақ елін дамыған мемлекеттердің отыздығына кіру жөніндегі жоспарды жүзеге асыруды тапсырып, маңызды құжат бірқатар салалардың жұмысын жүйелеуге сеп болды. Бұл құжат кәсіби мемлекеттік аппарат құру, заңның үстемдігін қамтамасыз ету, индустрияландыру және экономикалық өсім, біртектілік пен бірлік, есеп беретін мемлекетті қалыптастыру бағыттарын айқындап берді – деген Айдарбек Аянбекұлы Мемлекет басшысының биылғы жылғы Жолдауын талқылады.
Бастауыш партия ұйымының өкілдері де өз ойларын ортаға салып, пікірлерімен бөлісті.
С.НҰРАДИН
