Аудан әкімінің міндетін атқарушы Айбек Бидаев жаңа сайланған Қаракемер, Бәйдібек би, Жаңашар ауылдық округтерінің әкімдерін таныстырып, жұмыстарына сәттілік тіледі.
Өткен жексенбіде Қаракемер, Бәйдібек би, Жаңашар ауылдық округтерінде әкім сайлауы өтті. Жергілікті тұрғындар саяси науқанға белсене қатысып, өз таңдауларын жасады. Нәтижесінде 86,7 пайыз дауыс жинаған Дархан Ахметов айқын басымдықпен жеңіске жетіп, қайтадан Қаракемер ауылдық округінің әкімі болды. Сондай-ақ, округ тұрғындарының 71,95 пайыз дауысын жинаған Еспол Рысбаев Бәйдібек би ауылдық округінің, ал 43,7 пайыз дауыс алған Бахытжан Чурмаков Жаңашар ауылдық округінің әкімі қызметіне кірісті.
Елді мекендердің жұртшылығына сайлаудың қорытындысын жариялаған аудандық сайлау комиссиясының төрағасы Бақыт Жексембиев жаңа әкімдердің қызметтік куәліктерін табыстады. Аудан әкімінің міндетін атқарушы Айбек Бидаев еліміздің тарихи жаңғыру кезеңде өз міндетіне кіріскелі отырған округ әкімдерінің атқарар міндетінің жауаптылығын, олар қашанда жергілікті жұртшылықпен кеңесе отырып келелі іс атқару керектігін айтты. Ал ауыл ақсақалдары ақ бата беріп, жаңа сайланған елді мекен басшыларының жұмысына сәттілік тіледі. Өз кезегінде жаңа сайланған округ әкімдері өздеріне үміт артқан тұрғындардың сенімінен шығатынын айтып, елді мекеннің өркендеуі жолында аянбай тер төгетіндерін жеткізді.
Ерзат АСЫЛ.
