Жуырда оқушылардың бойына рухани адамгершілік қасиеттерді ұялату және бәсекелестік қабілетін арттыру, сонымен бірге, этностар арасындағы достық пен ынтымақтастыққа баулу мақсатында Түрген ауылы, Д.Қонаев атындағы орта мектепте Гонгконг қаласынан келген «Drop of Life» компаниясының жетекшілерімен «Жылы жүрек – жомарт қол» тақырыбында кездесу болып өтті.
Елбасы Н.Назарбаев: «Ынты-мақтастық пен бірлік, ел тағдыры үшін жауапкершілік – бұл біздің қуатымыз бен ертеңгі күнге деген сеніміміздің қайнар көзі», – деген болатын. Демек, ертеңіміз ерекше, болашағымыз баянды болуы үшін көршілерімізбен тату ғұмыр кешу – ең басты қажеттілік. Осындай татулық пен бірлігіміздің белгісі ретінде сонау Гонгконгтан келген қонақтарды Р.Ахметова бастаған мектеп ұжымы ерекше құрметпен қарсы алды. Қонақтарға мектептің тарихы мен бүгінгі тыныс-тіршілігі таныстырылып, қазақтың қонақжайлық дәстүрі көрсетілді. Түрген ауылдық округінің әкімі Б.Елеусізова келген қонақтарға жылы лебіз білдіріп, ел атынан алғысын жеткізді. Сонымен бірге, оқушылардың дайындаған шағын концерттік бағдарламасын тамашалады. Одан әрі балалармен бірге ойын ойнап, жүздеген балаға сыйлық үлестірді. Болашақта «Drop of Life» компаниясы өз қаржысымен мектепке көмек бермекші. Сол арқылы мектептің материалдық базасы артып, гүлдене түспек.
Нұрсерік ТІЛЕУҚАБЫЛ.