Кеше ауданымызда «Елбасы медалі» жобасының жеңімпаздары марапатталды. Алты ай бойы өзін-өзі дамытумен айналысқан жастар арасында бәсекеге түскен 6 оқушымыз топ жарып, «Елбасы медалі» иегері атанды.
Өңіріміздің даңқын республика деңгейінде асқақтатқан дарынды түлектерімізді марапаттау рәсіміне аудан әкімі Әлібек Жақанбаев, аудан әкімінің бірінші орынбасары Айбек Бидаев және білім бөлімінің басшысы Бәтес Аманова қатысты. Шарада қабілетімен топтан озған Рахат орта мектебінің оқушысы Жанерке Берік, В.Терешкова атындағы орта мектеп оқушысы Айдана Ниязалиева, И.Шорманов атындағы орта мектептің оқушысы Гүлнұр Ермаханбетова, Қорам орта мектебінің оқушысы Томирис Есенгелді, Қойшыбек орта мектебінің оқушысы Аружан Жұмабекова, Ш.Смағұлов атындағы дарынды балаларға арналған мамандандырылған физика-математика орта мектеп – интернатының оқушысы Асқар Мұқатайға «Елбасы медалі» мен аудан әкімінің алғыс хаты табысталды. Талантты жастарды табысымен құттықтаған Әлібек Әскербекұлы: «Бұл жүлде толағай табыстарыңыздың алды болсын! Сіздердің бойларыңызға патриоттық және белсенді азаматтық қасиетті сіңіріп тәрбиелеген ата – аналарыңызға алғысым шексіз», – деп ағынан жарылды. Елдің болашақ иелерінің жүрегіне «Елбасы медалі» жобасы асқақ арман ұялатты. Қатысушылар жоба барысында спорт, кітап оқу, волонтерлік және туристік саяхат сияқты 7 бағыт бойынша өздерін дамытты. Бақ сынаушыларға тәлімгерлер күнделікті тапсырма беріп, оның орындалуын бақылап отырды. Бұл игі жоба талай жас ұрпақтың табысты жолына бағыт беретіні сөзсіз.

Ерзат АСЫЛ