Бүгінде ауданымызда тұрғындарды жұмыспен қамту шаралары қарқынды жүргізілуде. «Еңбекшіқазақ ауданы әкімдігінің халықты жұмыспен қамту орталығы» коммуналдық мемлекеттік мекемесі аудан аумағында жұмыспен қамтуға жәрдемдесудің белсенді шараларын, жұмыссыздықтан әлеуметтік қорғауды ұйымдастыру және 2016 жылғы 6 сәуірдегі «Халықты жұмыспен қамту туралы» Қазақстан Республикасының Заңы негізінде қызмет көрсетеді.

2021 жылдың І тоқсанының қорытындысы бойынша орталыққа 1369 адам жүгінген. Оның 981-і жұмыссыз ретінде тіркеліп, ақылы қоғамдық жұмысқа 686 азамат, әлеуметтік жұмыс орындарына – 63, жастар тәжірибесіне 37 азамат жіберілді. Ал 855 адам жұмысынан айырылуына байланысты жәрдемақы алғандар.

«Еңбек» нәтижелі жұмыспен қамтуды және жаппай кәсіпкерлікті дамытудың 2017-2021 жылдарға арналған мемлекеттік бағдарламасы аясында орталық тарапынан 3 бағыт бойынша қызмет көрсетіледі. Алғашқы бағыты бойынша, ауданда орын алған нарықтық жұмыс орындарының қажеттілігіне байланысты бағдарлама қатысушыларын техникалық және кәсіптік білімі бар кадрларды даярлау және қысқа мерзімді қайта даярлау курстарымен қамтамасыз ету мақсатында 535 адамды оқыту жоспарлануда. Оның ішінде техникалық және кәсіптік білімі бар кадрларды даярлауға 175 азаматты оқыту, қысқа мерзімді қайта даярлау курстарына 360 адам жіберу көзделуде.

Ауылдық елді мекендерде жаппай кәсіпкерлікті дамыту – бағдарламаның екінші бағыты. «Бизнес бастау» жобасы шеңберінде ағымдағы жылы 350 азаматты кәсіптік оқуға жіберу, сонымен қатар, 350 азаматқа несие беру жоспарланып отыр. Үшінші бағыт – халықты жұмыспен қамтуға жәрдемдесу және еңбек ресурстарының ұтқырлығы арқылы еңбек нарығын дамыту. Бұл мақсатта әлеуметтік кәсіптік бағдарлау, кәсіп таңдауда көмек көрсету, оқу және жұмысқа орналасу мәселелері бойынша кеңес беріледі.

Тұрғындарды ақылы қоғамдық жұмысқа тарту жұмыстары да жүйелі жүзеге асуда. Биыл осы бағытта 1060 азаматты жұмыспен қамту көзделсе, оның 686-сы жолдама алған. Әлеуметтік жұмыс орындарын ұйымдастыруға 136 азамат жоспарланып, қазіргі таңда 63 адам жолдамамен жұмысқа жіберілді. Жастар практикасынан өтуге жұмыс берушілердің өтінімдеріне сәйкес ауданның 128 түлегін жұмысқа орналастыру жоспарланған. Бүгінде жастардың 37-сі жұмыспен қамтылды.

Сонымен қатар,  оқуын аяқтап, алғаш рет жұмысқа орналасқан жастарды қолдау мақсатында «Еңбек» бағдарламасының «Алғашқы жұмыс орны» жобасы жұмыс жасайды.  Бұл бағытта 3 адамды жұмысқа орналастыру көзделіп,  қазіргі таңда 2 азамат өтінімге сәйкес жолдамамен жұмысқа жіберілді.

Бағдарламаның жастар үшін тағы бір тиімді бағыты – «Ұрпақтар келісімі» жобасы. Зейнеткерлікке шыққан қызметкердің орнына жас маманды орналастыру бойынша 3 азаматты жұмыспен қамту жоспарланған.

А.САНЬКОВА,

жұмыспен қамту орталығының

 бөлім басшысы