Өткен аптада «Nur Otan» партиясының аудандық филиалында Саяси Кеңес Бюросының отырысы өтті. Күн тәртібінде бір мәселе қаралды. Ол – 2021-2025 жылдарға арналған «Жастар – Отанға» бағдарламасын Еңбекшіқазақ ауданы бойынша жүзеге асыру жөніндегі Жол картасын бекіту.

Отырысты ашқан «Nur Otan» партиясы аудандық филиалы төрағасының бірінші орынбасары Қуат Сұлтанов: «Ауданымызда 14 пен 29 жас аралығында 70 мыңға жуық жас бар. Сан жағынан алсақ, бұл көрсеткіш бір ауданның халқымен тең. Жастармен жұмыс істеуге үлкен ден қоюымыз керек. Осы орайда біздің «Жастар – Отанға» атты партиялық бағдарламамыздың алар орны ерекше», – деді. Жалпы айтсақ, бұл бағдарлама жастардың өмір салтын дұрыс, әрі қоғамға да, өзіне де пайдалы етіп қалыптастыруға бағытталған.  

Әр жастың қоғам өміріне белсенді араласуы, тұлғалық дамуы, уақытын тиімді пайдалануы, жағымсыз әдеттерден бойын аулақ ұстауы және қазіргі күні үлкен мәселеге айналған – деструктивті діни ағымдардан аулақ болуы, жас отбасыларының әлеуметтік мәселелері, баспана мен жұмысқа орналасуы сынды сұрақтарды жан-жақты қамтыған 2021-2025 жылдарға арналған «Жастар – Отанға» бағдарламасының Жол картасын Еңбекшіқазақ ауданы Жастар ресурстық орталығының жетекшісі, «Jas Otan» жастар қанатының төрағасы Мәди Бердібаев таныстырды. Жоспарға енген әр мәселе өзекті, әрі оның шешу жолдары да тиянақты жазылған.

Жастардың талпынысы мен әр мәселені бүге-шігесіне дейін саралай алуы болашақтан көп үміт күттіреді. Мағжан Жұмабаев айтпақшы, «Көздерінде от ойнар, Сөздерінде жалын бар, ...Мен жастарға сенемін!»

Құралай МҰРАТҚЫЗЫ