«Ұстаздық — ұлық емес, ұлы қызмет» – деп Б.Момышұлы айтқандай, мемлекетіміздің өркендеп, өсуіне өз үлестерін қосып жүрген әрбір азаматтың артында тәрбие нәрімен сусындатқан ұлы есім «ұстаз» тұр. Елімізде карантин режимі енгізілгелі бері ұстаздар қауымына да оңай болмады. Әр саланың өз қиындығы болса, ұстаздық солардың ең шарықтау шегі десек, артық айтқандық емес. Осы орайда, жас ұстаздарға қолдау көрсету, олардың еңбектері мен жетістіктерін насихаттау мақсатында аудандық жастар ресурстық орталығының ұйымдастыруымен «Қазақстандық салалық білім және ғылым қызметкерлері кәсіптік одағының Алматы облыстық ұйымы» қоғамдық бірлестігінің Еңбекшіқазақ аудандық филиалының қолдауымен «Жас ұстаз – 2021» атты жас ұстаздар арасында онлайн видео байқауы өтті.
Байқау барысында жас ұлағат иелері өздерінің және оқушыларының жеткен жетістіктері туралы арнайы бейнеролик дайындап, әлеуметтік желіге жариялады. Шараға Есік қаласы мен ауылдық округтерден 20 жас маман қатысып, жүзден жүйрік шыққан ұстаздар марапатталды. Атап айтсақ, жүлделі І орын Бәйтерек ауылдық округінен Фариза Сайрамқожаға бұйырды. Шелектік Балжан Абсаттарова ІІ орынға, саймасайлық Гүлмира Абаева ІІІ орынға жайғасты. Әлеуметтік желіде «Көрермендер көзайымына» айналған Бөлек ауылдық округінің жас ұстазы Құралай Галфайға номинация беріліп, барлық жүлдегерлерге байқау демеушісі тарапынан бағалы сыйлықтар табыс етілді. Марапаттау рәсімін өткізген аудандық жастар ресурстық орталығының жетекшісі Мади Бердібаев жас ұстаздар еңбегіне табыс тіледі.
Айжан ӘБІТ,
жастар ресурстық орталығының маманы.
