Ауданымызға көгілдір отын келгелі қуанышымыз еселеніп, тұрғындардың тұрмысы жеңілдей түсті. Есік қаласы мен бірнеше ауылдық округте газ құбырларын тарту жұмыстары аяқталуға жақын. Десек те, көпқабатты тұрғын үйлердің тұрғындары осы күнге дейін табиғи газға қолы жетпей әлек болған. Биыл бұл мәселе оң шешімін тауып, көппәтерлі үйлерге БМҚ (блокты-модульді қазандықтар) салу үшін бюджеттен қаражат бөлінді. Өткен аптада аудан орталығындағы 1-шағын ауданда алғашқы БМҚ-тың іргетасы құйылып, құрылыс жұмыстары басталды.

Құрылыспен арнайы танысқан облыстық энергетика және тұрғын үй-коммуналдық шаруашылық басқармасының басшысы Бағлан Тәнекенов, аудан әкімінің орынбасары Алтай Досымбаев мердігер «Construction Big House» жауапкершілігі шектеулі серіктестігіне нысан құрылысын мерзімінде аяқтауды тапсырды. Бұл қазандық аталған мөлтек аудандағы №1, 2, 3, 4 тұрғын үйлерді жылумен қамтамасыз етпек.

– Алматы облысында көпқабатты тұрғын үйлерді орталықтандырылған жылу жүйесіне қосу 2018 жылдан бері қолға алынған. Бұл жұмыстар жаспар бойынша кезең-кезеңімен жүзеге асуда. Биыл мемлекеттік-жеке меншік серіктестік арқылы облыста 40 БМҚ-ты 6 ауданда орнатуды жоспарлап отырмыз. Бұл көпқабатты 110 үйді жылу жүйесімен қаматамасыз етеді. Жалпы, екі жыл ішінде облысымызда көпқабатты 323 тұрғын үй орталықтандырылған жылу жүйесіне қосылады. Еңбекшіқазақ ауданында 21 БМҚ салу жоспарлануда, – дейді Бағлан Тәнекенов.

Айта кетейік, аудан аумағында 21 БМҚ-тың жобалық сметалық құжаттарын әзірлеуге бюджеттен 19 млн теңге қаржы бөлінген. Бүгінгі таңда 3 жобалық-сметалық құжаттама сараптамадан өтіп, қалғаны кесте бойынша жүзеге асады. Есік қаласында 17 БМҚ салынып, оған көпқабатты 72 тұрғын үй қосылады, яғни 16 960 тұрғын орталықтандырылған жылу жүйесімен қаматамасыз етіледі. Шелек ауылында жоспарланып отырған 4 БМҚ 7 тұрғын үйдегі 6 108 тұрғынға «жылу сыйлайды».

Жоспарға сәйкес, жылыту маусымына дейін 21 БМҚ құрылысының 70 пайызы аяқталып, көппәтерлі тұрғын үйдің тұрғындары көгілдір отынның қызығын көрмек.

Сардарбек НҰРАДИН