Қазіргі таңда өзекті проблемаға айналған жұмыссыздықты азайту және жұмыссыз жастардың арасында мемлекеттік арнайы бағдарламаларды түсіндіру, насихаттау мақсатында аудандық халықты жұмыспен қамту орталығы және жастар ресурстық орталығының ұйымдастыруымен осы аптада Есік қаласындағы Т.Молдағалиев атындағы аудандық мәдениет үйінде жұмыссыз, маргинал жастардың қатысуымен бос орындар жәрмеңкесі өтті.
Шараға аудандық халықты жұмыспен қамту орталығының білікті мамандары келіп, жиналған жастарға мемлекеттік бағдарламаларды кеңінен түсіндірсе, мемлекеттік және жекеменшік мекемелерден де, атап айтар болсақ «ADAL», «FOOD MASTER» ЖШС-нің мамандары өздерінің мекемелеріндегі бос жұмыс орындарына жастарды шақырды. Ал аудандық жастар ресурстық орталығының мамандары жиналған жастарға мемлекеттік бағдарламалар бойынша кеңестер берді. Жәрмеңкеге жалпы 50-ге жуық жас қатысып, оның ішінде Малыбай және Бөлек ауылдарының тұрғындары «ADAL», «FOOD MASTER» ЖШС-нің басшылықтарына түйіндемелерін қалдырып, әңгімелесуге баратын болып шешілді. Тоқсан сайын ұйымдастырылатын бұл жәрмеңкенің соңында жиналған жастарға арнайы ақпараттық парақшалар да таратылды.
Айжан ӘБІТ,
жастар ресурстық орталығының маманы
