Өткен аптаның сәрсенбісінде Талдықорғандағы Тіл сарайында ZOOM интернет порталы арқылы облыстық ардагерлер ұйымының есеп беру-сайлау конференциясы өтті. Бұл алқалы жиынға аумақтағы аудан, қала ардагерлер ұйымдарымен қатар біздің Еңбекшіқазақ ауданынан сайланған ардагерлер ұйымының өкілдері де онлайн форматта аудан әкімдігінің конференц залында қатысып отырды. Бейнеконференция жұмысына облыс басшысы Амандық Баталов қатысып, ардагерлер ұйымының жұмысына оң баға берді және облыстың әлеуметтік-экономикалық даму көрсеткіштерімен бөлісіп, ел Тәуелсіздігінің 30 жылдығы қарсаңында Алматы облысының орталығы Талдықорған қаласына көшірілгеніне 20 жыл толғанын атап өтті.
Конференцияда ұйымдастыру-сайлау мәселелері талқыланып, ардагерлер ұйымының кеңесі құрылды. Төр-ағасы болып Ермек Келемсейіт сайланды. Сонымен қатар Қазақстан Республикасының ардагерлер ұйымының VIII съезіне делегаттар сайланды.
ZOOM порталы арқылы облыстық ардагерлер ұйымының бейнеконференциясына қатысып отырған ауданымыздың ардагерлер ұйымы өкілдерімен аудан әкімі Әлібек Жақанбаев пікір алмасып, Есік, Шелек, басқа елді мекендердегі құрылыс, жөндеу жұмыстары жайлы, абаттандыру, тұрғындар тұрмысына қолайлы жағдай жасау тұрғысындағы жоспар-жобаларымен бөлісті. Алматы және Абай көшелерінің қиылысындағы Керей-Жәнібек хандардың стела-ескерткіші шағын сквер жабдықталып, соның ортасына көшіру жұмысы атқарылуда. Есік қаласына 150 бейнекамера орнаты-лады. Бұның өзі тұрғындар қауіпсіздігіне және қала тазалығына айтарлықтай көмек берері анық. Шелек ауылында «Роща» аталған демалыс аумағы бар. Есік қаласының жоғарғы жағында дәл осындай жасыл желек жайқалып тұр. Көшелерімізді, демалыс аймақтарын, тәрбиелік-патриоттық маңызы бар нысандарды, спорттық мәдениеттік құрылымдарды ретке келтіру мәселелері де қозғалды әкімнің ардагерлермен пікір алмасу барысында.
Қ.ҚАСЫМҰЛЫ.
