Ия, ерлер есімі қашанда ел есінде мәңгі сақталады. Отан үшін от кешкендер елінің ертеңі үшін, тәуелсіздігі үшін жандарын пида еткен ерлерді келешек жадында сақтау мақсатында Ауыт Саттаров атындағы орта мектепте «Тәуелсіздік – еркіндігі елімнің» атты есімі ел есінде сақталған ерлерге арналған бұрыштың тұсау кесер қуанышын ел Тәуелсіздігінің 30 жылдық мерекесімен бірге атап өтті.
Бұл жиынға аудан әкімінің, білім бөлімінің өкілдері, Қаратұрық ауылдық округінің әкімі Айбек Ілебаев, Ащысай, Қаратұрық, Достық ауылдарының ақсақалдар кеңесінің төрағалары, Сайын Өміржанов, Мұхтаржан Мурадилов, Баққожа Қоғамбаев, Саттаровтар әулеті, Ауған соғысының ардагерлері, сондай-ақ ұйғыр мәдениет орталығының төрайымы Гулинур Бакиева, VІІІ «Алтын домбыра» республикалық ақындар айтысының жеңімпазы, айтыскер ақын Рүстем Қайыртайұлы қонақ болып қатысты.
Еліміздің Гимні асқақтата орындалған соң, мектептің 30 дарынды оқушысы «Мен қазақпын» деген рухты әнді шырқады.
Қош келдіңіз ордасына білімнің,
Ұзақ еткей қуаныштың ғұмырын.
Есімдері ұмытылмыс ерлердің,
Ұрпақтары ұлықтасын тұғырын.
Көк байрағым көгімізде желбіреп,
Ынтымақтың асқақтатсын мығымын, – дәлел дегендей құтты қонақтар «Даңқ» және «Саттаров» бұрышының лентасын қиды. Айтыскер ақын Рүстем Қайыртайұлы сөз сөйлеп, мерекемен құттықтап, өлеңмен жылы лебізін жеткізді. Одан кейін Г.Бакиева жүрекжарды ыстық лебізін арнады.
Ел тәуелсіздігі мерекесі құрметіне мектептің 30 оқушысы, әртүрлі олимпиадалар мен жарыстардың, байқаулардың, сайыстардың жеңімпаздары республикалық біріңғай «Жас ұлан» балалар мен жасөспірімдер ұйымының қатарына қабылдау салтанатында мектептің мақтанышы «Бейбітшілік әлемі» халықаралық ұстаздар одағының І дәрежелі диплом иегері, өнерлі өрендердің «ART TIME» ІV халықаралық байқаудың І орын иегері және қазақ радиосының 100 жылдық мерейтойына жүргізушілікке жолдама алған 5 сынып оқушысы Елтай Мұнар көпшілік атынан ант қабылдады. айтыскер ақын Мұнарға өлеңдетіп алғыс-батасын берді. 1 сынып оқушылары тақпақтарын айтып, салтанатты жиын концертке ұласты. Меркелік кеш 10 сынып оқушысы Жанель Дүйсенбайдың «Қазақстаным, алға!» әнімен аяқталды.
Анарбек МӨКІШҰЛЫ
