Қаңтар қақтығысында елдің тыныштығы мен қауіпсіздігін күзетуде Қаракемер ауылында орналасқан Ұлттық ұланның 6654 әскери бөлімі де сырт қалған жоқ.
Антына адал ұландықтар: әскери қызметшілер мен сарбаздар түгелдей дерлік Алматы қаласындағы қанды қақтығысты тоқтатуға барын салды. Өкінішке қарай, олардың арасында жаппай тәртіпсіздік кезінде шерушілер мен лаңкестердің қолынан жарақаттанғандары да бар. Бүгінде жарақаты жеңіл жауынгерлер 6654 әскери бөлімінің ауруханасында – лазаретте жатыр.
Кеше ол сарбаздардың хал-жағдайын білу үшін әскери бөлімге Қаракемер ауылдық округінің әкімі Д.Ахметов пен ауыл ақсақалдары арнайы барды. Елі мен жерінің тыныштығы, тұрақтылығы үшін аянбайтын ұландық жас сарбаздарға халық атынан алғысын айтып, ауылдың үлкендері ақ баталарын берді. Сондай-ақ шағын сый-сияпатын жасап, жауынгерлерді жігерлендіріп қоюды да ұмытпады.
Қ.МҰРАТҚЫЗЫ