«Nur Otan» партиясы Еңбекшіқазақ аудандық филиалы жанындағы партиялық бақылау комиссиясының биылғы бірінші отырысы өтті.

Комиссияның төрағасы Асыл Байтулақов 2022 жылға арналған жұмыс жоспарын таныстырды. Күн тәртібіндегі екінші мәселе бойынша Ават және Бәйтерек БПҰ-дың төрағалары сөз алып, баяндама жасады. Партияның құрамы, ішкі тәртіп, сондай-ақ былтыр тұрғындарға партия тарапынан көрсетілген көмекке тоқталып, «BizBirgemiz» акциясы және «Nur Otan» партиясының жобалары аясында жасалған жұмыстар сараланды. Бұдан бөлек округ аумағындағы өзекті мәселелер сөз болып, талқыға түсті. Мысалы, Бәйтерек ауылдық округінің саяжай тұрғындарынан түсетін шағымның бірі – оқушыларды мектепке тасымалдау мәселесі. Бүгінде аталған округ саяжайларында 6830 тұрғын болса, оның 910-ы – мектеп жасындағы бала. Ол оқушыларды мектепке күнделікті 8 автобус тасымалдайды екен. Ондағы барлық орын саны – 277. Тасымалдайтын мекеме – «Казтек Агротранс» ЖШС. Осы орайда комиссия мүшелері автобустардың толық құрамда жұмыс істеуін бақылауға алып, тендер ойнатқан және оны ұтқан тараптардың жауапсыздығы мен жұмысқа деген немқұрайлығынан балалар зардап шекпеуі керектігін ескертті. Ават ауылдық округінің әкімі Т.Мадьяров өңірде ауызсу жүйесі жүргізілгеннен кейін 33 көшенің 20-25%-ына күрделі жөндеу жұмысы қажеттігін, оған тиісті қаржы бөлінсе деген ойын да айтты.

Комиссияның төрағасы Асыл Байтулақов баяндамашыларға жан-жағы жұмыр әдемі есеп үшін өңірдегі өзекті мәселелерді жылы жауып қоймай, осындай отырыстарда талқыға салып, шешімін бірге табуға тырысу керектігін айтты.

Құралай МҰРАТҚЫЗЫ.