Алматы облысында тергеу және уақытша ұстау изоляторларынан 33 адам босатылды, оның ішінде 8 кәмелетке толмаған бала ата-анасының қамқорлығына алынды. Бұл бағыттағы жұмыстар жалғасуда. Бұл туралы «Jetisy Media» алаңында өткен баспасөз-мәслихатында белгілі болды.
Алматы облысында 88 адам қамауда отырса, 60-на қоғамнан оқшаулаумен байланысты емес басқа да бұлтартпау шаралары таңдалды.
Бұлтартпау шарасы жеке басын, жасын, денсаулық жағдайын, қатысу дәрежесін, әрекетке қатынасын және басқа да сипаттайтын мәліметтерді мұқият зерттегеннен кейін таңдалды.
Қаңтар оқиғасының салдарынан облыс бойынша 758 адам зардап шекті, оның ішінде 643-і полиция қызметкері, 78-і әскерилер, 37-сі бейбіт тұрғындар, көпшілігі жеңіл жарақаттар алды, олардың өміріне қауіп төніп тұрған жоқ.
«Іс-әрекеттерінде ауырлататын мән-жайлар жоқ адамдарға жазаны жеңілдету бөлігінде Мемлекет басшысының тапсырмасын орындау мақсатында шаралар қабылдануда. Мұнда әрбір құқық бұзушыға жеке мән беріп отырмыз. Сипаты мен санатының ауырлығы бағаланды»,- деді Алматы облысы прокурорының міндетін атқарушы Рашид Әміров.
Айта кетейік, қаңтар оқиғасы бойынша барлығы 409 қылмыстық іс тергелуде, оның 158-і ұрлық, 191-і қаруды заңсыз сақтау, 11-і терроризм, 3-і жаппай тәртіпсіздік, 3-і кісі өлтіру және т.б. қылмыстар.
Тергеу нәтижелері бойынша жеңілдету мақсатында 93 апелляциялық өтінішхат енгізіліп, сотпен прокурордың актілері қанағаттандырылды. 71 тұлға қамаудан босатылды, 22-не айыппұл ескертуге ауыстырылды. Қазіргі таңда облыс бойынша әкімшілік қамауда отырған адамдар жоқ.
Естеріңізге саламыз, Сыбайлас жемқорлыққа қарсы қызметімен азаптау фактілерімен 37 қылмыстық іс тергелуде.
- Жәбірленушілердің өтініштерінде құқық қорғау органдарының қызметкерлері "қаңтардағы оқиғалар" бойынша қылмыстық істерді тергеу кезінде жәбірленушілерге қатысты қылмыс жасады деп тану мақсатында азаптаулар жасағаны баяндалған. Полиция және басқа да құқық қорғау органдары қызметкерлерінің әрекеттеріне қатысты қорғаушылар, туыстары, ата-аналары және жәбірленушілердің өздері өтініш білдірді. Сонымен қатар, күн сайын қажетті тергеу әрекеттері жүргізілетін БАҚ мониторингі жүргізіледі.Қазіргі уақытта тергеудің жан - жақтылығын қамтамасыз ету үшін күн сайын бірқатар тергеу амалдары жүргізілуде, - деді Сыбайлас жемқорлыққа қарсы қызмет департаменті бастығының орынбасары Дулат Мадияров.
"Атыс қаруы заңсыз сақталған адам оны өз еркімен берген жағдайда, егер оның әрекеттерінде өзге қылмыс құрамы болмаса, қылмыстық жауаптылықтан босатылады", - деп аяқтады Алматы облысы ПД Тергеу басқармасының бастығы Руслан Чарапиев.
«JETISÝ MEDIA».
