Осы аптада «Nur Otan» партиясы аудандық филиалы жанындағы денсаулық сақтау және білім секторы бойынша аудандық қоғамдық кеңесінің отырысы өтті.
Жиын барысында комиссия төрағасы Айжан Талқанбава 2022 жылға арналған жұмыс жоспарын таныстырды. Күн тәртібіндегі екінші мәселе бойынша Еңбекшіқазақ ауданаралық көпсалалы аурухананың сатып алуға жауапты маманы Әжібай Әлмен сөз алып, баяндама жасады. Бүгінде ауданымызда 100%-ға дейін алғашқы медициналық-санитарлық көмек мекемелерді медициналық жабдықтармен қамтамасыз етуге күш салынуда. Ол үшін цифрлық маммографтар, бейне эндоскопиялық кешендер, жиынтықтағы микроскоппен және оптикасы бар бейнеэндоскоп-пен емдеу-диагностикалық ЛОР комбайн және басқа да медициналық құралдар сатып алынған. Сондай-ақ 2022 жылы да жаңа аппараттарға тапсырыс берілмек. Ал келесі кезекте сөз алған аудандық білім бөлімі басшысының орынбасары Әсел Молдасбаева аталған саладағы өзекті мәселелерге тоқталды.Қазір ауданымызда үш ауысымда білім беретін мектептердің санын азайту үшін 4 жаңа мектеп салу жоспарланған. Оның ішінде Ташкенсаз ауылындағы Абдуллин атындағы орта мектепке (2021-2022 жж.) 300 орындық жапсаржай, Қазақстан ауылындағы Қайыпов атындағы орта мектепке 300 орындық жапсаржай салынып, Есік қаласында 1500 орындық жаңа мектептің құрылыстары жүргізілуде. Ал Рахат ауылдық округінде 1200 орындық мектеп құрылысы 2025 жылы аяқталады деп жоспарлануда. Сонымен қоса, Алмалы, Ақтоған, Екпінді, Қазатком, Қайрат, Төле би, Азат ауылдарында бейімделген 2010 орындық 7 жаңа мектеп салу қолға алынбақ. Ал 2022 жылғы жоспарға сай Төле би ауылында 450 балаға арналған жаңа мектептің іргетасы қаланса, Шелек аулындағы Абай атындағы орта мектеп пен Ащысай ауылындағы Ш.Уәлиханов атындағы орта мектеп күрделі жөндеуден өтпек.
Комиссияның төрағасы Айжан Талқанбаева баяндамашыларға тек қана есеп үшін денсаулық сақтау және білім саласындағы өзекті мәселелерді жылы жауып қоймай, осындай отырыстарда талқыға салып, шешімін бірге табуға тырысу керектігін, аталған саладағы салынып жатқан нысандардың сапасына баса назар аудару керектігін ескертті. Жиналысты қортындылған «Nur Otan» партиясы аудандық филиал төрағасының бірінші орынбасары Қуат Байғоджаев Мемлекет басшысы Қасым-Жомарт Тоқаевтың жаңа міндеттемелері шынайы іс істеуді, халыққа адал қызмет етуді талап ететіндігін, сондықтан өнімді жұмыс атқару қажеттігін жеткізді.
Е.АСЫЛ.
