Халықаралық әйелдер күніне орай Шелек тарихи-өлкетану музейінің қызметкерлері «Сыйынар ем ана деген тәңірге» атты мәдени кеш ұйымдастырды.
Мәдени шараға Шелек ауылдық мәдениет үйінің көркемдік жетекшісі, әнші Қалбүбі Ысқақова, Шелек ауылдық округі әкімі аппаратының жастар ісі жөніндегі әдіскер-нұсқаушысы Бибінұр Молдабекова және ауылымыз бен ауданымыздың мақтанышына айналған, ұлттық салт-дәстүрімізді насихаттап, халық әндерін нақышына келтіріп орындап жүрген Шелек ауылындағы «Әй, әжелер» ансамблінің мүшелері қатысты. Мәдени кеште әжелер ансамблі «Сәулем-ай», «Ақ тамақ» сынды әндерді айтып, өздерінің жетістіктерімен бөліссе, Шелек ауылдық мәдениет үйінің көркемдік жетекшісі Қалбүбі Ысқақова әжелерімізді мерекемен құттықтап, ән айтты. Кешті ауыл тұрғындары мен колледж студенттері тамашалады. Музей қызметкерлері мен ауылдық әкімдік қызметкерлері «Әй, әжелер» ансамблінің мүшелерінің иығына орамал жауып, гүл шоқтарын ұсынды. Соңында музей залдары бойынша экскурсия жүргізілді.
Жанар БОРАЛТАЙҚЫЗЫ,
Шелек тарихи-өлкетану музейінің экскурсия жүргізушісі.
