Есік қаласындағы №1 көпсалалы ауданаралық ауруханада Дүниежүзілік денсаулық сақтау ұйымының алғашқы медициналық-санитарлық көмек жөніндегі алғашқы демонстрациялық (үлгісін көрсету)платформасы ашылды.
Ашылу салтанатына ДДҰ-ның Еуропалық өңірлік бюросының басшысы Ханс Клюген, ҚР денсаулық сақтау министрі Ажар Ғиният, Өзбекстан Республикасы Денсаулық сақтау министрінің орынбасары Амрилло Иноятов, Өзбекстан Республикасы Мемлекеттік медициналық сақтандыру қорының директоры Фаррух Шарипов, Алматы облысының әкімі Қанат Бозымбаев пен аталған аурухананың қызметкерлері қатысты. Аталған платформаның ашылу салтанатында сөз алған облыс әкімі Қанат Бозымбаев Дүниежүзілік денсаулық сақтау ұйымы мен ҚР денсаулық сақтау министрлігі қолға алған жаңа жобаны барынша қолдайтындығын жеткізіп, аталған игі іске сәттілік тіледі.Өз кезегінде, ДДҰ Еуропалық өңірлік бюросының басшысы Ханс Клюге Қазақстан Үкіметі мен ДДҰ Еуропалық өңірлік бюросының арасындағы айрықша ынтымақтастықты атап өтті. Доктор Ханс Клюге демонстрациялық платформа үлгісінде, әсіресе ауылдық денсаулық сақтауда МСАК-тың үздік тәжірибелерін ілгерілету жөніндегі Қазақстанның күш-жігеріне өзінің таңданысын білдірді.
– АМСК демонстрациялық платформалары – ДДҰ-ның тиімді алғашқы медициналық-санитарлық көмек жүйесін іс-әрекетте көрсетуге арналған жаңа өнімі. Олар елдерге бір-бірінен үйренуге және алғашқы медициналық-санитарлық көмекті түрлендірудегі озық тәжірибемен алмасуға мүмкіндік береді. Қазақстан психикалық денсаулық мамандары мен әлеуметтік қызметкерлерді, сондай-ақ мейірбикелер мен отбасылық дәрігерлерді қамтитын көпбейінді командалар арқылы алғашқы медициналық-санитарлық көмек үлгісін өзгертудің үлгілі мысалы болуға лайық», – деді Еуропалық ДДҰ басшысы. Осыған сай, алғашқы медициналық-санитарлық көмек көрсету бойынша ДДҰ-ның бірінші демонстрациялық платформасы ауданымыздағы №1 көпсалалы аудан-аралық ауруханада ашылып отыр. ҚР денсаулық сақтау министрі Ажар Ғинияттың сөзінше, алда аталған ауруханада МСАК жүйесін трансформациялаудың жаңа базасы қалыптасады. Бүгінде Еуропалық стандартқа сай алғашқы медициналық-санитарлық көмек көрсетудің озық тәжірибесін үйрену үшін Өзбекстан делегациясы арнайы келіпті. Ажар Ғиниятқызы алдағы төрт жылда ДДҰ мен Қазақстан Үкіметі елімізден алғашқы медициналық-санитарлық көмек жүйесін үйренгісі келетін 20 елдің делегациясын қабылдайтынын атап өтті.
Е.АСЫЛ.
