Татулық пен бейбітшілікті басты орынға қойып, бақытты бағалай білген Қазақстан үшін бұл күннің орны ерекше. Міне, шежірелі Алтын адамның атақонысында жүзі басқа болса да жүрегі бір, тілі басқа болса да тілегі бір жандар жиналып, айтулы датаны ерекше атап өтуге атсалысты. Жамбыл атындағы  орталық  саябақта  өткен мерекелік шарада түрлі ұлыс өкілдері ән айтып, би билеп, мереке көркін қыздырды.

Ел басына күн туған қиын-қыстау заманда атамекенімізге түрлі ұлт өкілдері табан тіреп, киелі мекеннен пана тапты. Бауырмал қазақ халқымен бір нанды бөлісіп жеп, бір үйдің баласындай етене араласты. Міне, соның нәтижесінде бүгінде ауданымызда орыс, ұйғыр, түрік, шешен, күрд сынды 54 ұлт өкілдері ауызбіршілікпен тату-тәтті ғұмыр кешуде.

Қазақстан халқының бірлігі күніне арналған мерекелік шарада аудан әкімі Қуат Сұлтанғазиев елдің тыныштығы мен татулығын тілге тиек етіп, көпшілікті ортақ мерекемен құттықтады.

– «Дамудың сыры – бірлікте, табыстың сыры – тірлікте» дейді дана халқымыз. Ауызбіршілік пен түсіністік, қарапайым сыйластық үстемдік құрған жерде ғана нәтижелі істердің болатыны белгілі. Сан ұлтқа сая болған Жетісу жеріндегі қасиетті Еңбекшіқазақ ауданы халқының ауызбіршілігі мен татулықты ту еткен ынтымағы ұрпаққа үлгі, болашаққа өнеге, – деді Қуат Елеусізұлы.

 Е.АСЫЛ.