Раушан ТАСЫБАВА, бас бухгалтер:

– «Еңбекшіқазақ» газетінің редакциясын қалай сипаттауға болады?

 – Мен 20 жылдан бері осы газет редакциясында қызмет атқарып келемін. Бұл өзіндік тарих пен дәстүрге ие берекелі ұжым. Әрине, уақыттың ағысымен түрлі  қиындықтарды еңсеріп, алға жүзіп келеміз. Мен мұнда ұзақ жыл қызмет еткен ардагер журналистердің де алдын көрдім. Олар құшағы кең, өте ізгі жандар еді. Бүгінде сол бір асыл бейнелерді сағына еске аламын. Ал қазір газет ұжымында буын алмасып, жастардың қатары толығып келеді. Менің бір байқағаным мұндағы жандар бір-біріне тез бауыр басып кетеді. Сол үшін де газет редакциясын үлкен отбасыға ұқсатамын. Өйткені осында  барлығы үлкенге құрметпен, кішіге ізетпен қарайды.

Сол себепті ұжымдағы әрбір мүшенің туған күні мен өзге де қуанышы назардан тыс қалмайды. Ұжымның әрбір мүшесі газет редакциясындағы жылулықты жан жүрегімен сезінеді. Қысқасы, біз өзіндік тарихы бар, қәсіби мамандар топталған берекелі ұжымбыз.

– Ұжымға айтар тілегіңіз?…

– Келіп жеткен кәсіби мерекеміз құтты болсын! Ұжымдағы әріптестеріме  зор денсаулық, шығармашылық табыс тілеймін! Газетіміздің тиражы көбейіп, редакциямыз көркейе берсін деген тілек айтқым келеді.

Ринат НАРХАНОВ, тілші:

– Сіздің ойыңызша, журналистің бойында болуға тиіс негізгі 3 қасиет қандай?

– Журналистиканы өмір бойғы ізденісті талап ететін мамандық деп есептеймін. Білім мен ізденіске қызықпайтын адамға бұл жерде орын жоқ деп білемін. Бөлтірік шешеннің өзінің баласына айтқан тәмсілі бар «не сөйлейтініңді біл, кімге сөйлейтініңді біл, қай жерде сөйлейтініңді біл» деген. Әсіресе журналистер қауымы осы сөзге баса мән беру керек секілді. Сұраққа келетін болсам журналистің бойында біріншіден батылдық, екіншіден шығармашылық ізденіс, үшіншіден ақиқатшыл болуы керек деп есептеймін.

– Өзіңіз жазған мақалалардың ішіндегі ең ұтымды, сәтті шыққаны қайсысы деп есептейсіз?

– Менің хоббиім әрі қосымша табыс көзім той жүргізу болғандықтан, қазақтың қазіргі таңдағы кемшілікке толы тойы мен бейсауат асабалардың қателіктерін сынаған «Сөз түзелді» атты мақалам сәтті шықты деп ойлаймын.