Еңбекшіқазақ аудандық кітапханасында 23 маусым күні өткен тарих ғылымдарының кандидаты Н.З.Такижбаеваның Мемлекет басшысы Қ.Тоқаевтың әкесінің ағасы Ұлы Отан соғысында ерлікпен қаза тапқан политрук Қасымға арналған «Политрук Қасым Болтаев: 186-я стрелковая дивизия» кітабының тұсаукесер рәсімін Аманат партиясы Еңбекшіқазақ аудандық филиалының атқарушы хатшысы Қ.Байғоджаев және «Еңбекшіқазақ» газетінің бас редакторы Х.Ахметжанов жасады.

Майдангер жазушы Кемел Тоқаев өзінің туған ағасы Қасым екеуінің балалық шағы көп қиындықта өткенін, майданға аттанып политрук (саяси жетекші) жауынгерлік қызметін өте ыхтияттылықпен атқарып, Ржев шайқасында ерлікпен қаза тапқанын баяндайды. Кемел Тоқаев артында ұрпақ қалдыра алмай өмірден өткен ағасының атын Жомарт ұлына қосып Қасым-Жомарт атаған екен. Екі том болып шығарылған кітапта көптеген архивтік деректермен қатар политрук Қасым Болтаевтың, Тоқаевтар әулетінің өмір жолдарынан үлгі боларлық әңгімелер басылған. Кітап тұсаукесерін жүргізген кітапханашы Г.Саурықова, директоры З.Бошығұлова, Райымбек батыр атындағы мектеп директоры С.Түрікбаева, тарихшы мұғалім А.Жұмабаев, оқырмандар пікірімен бөлісіп, тарихи кітаптың жас өркенді отансүйгіштікке тәрбиелеу, ісінде орны ерекше екенін атап өтті.

Н.МҰҢСЫЗБАЕВА.