Күні кеше мемлекет басшысы Қасым-Жомарт Тоқаев Үкіметтің кеңейтілген отырысын өткізді. Онда Президент, Үкімет мүшелері мен өңір әкімдеріне қазіргі таңдағы өзекті мәселелердің тиісті деңгейде қаралмағандығы жайлы және халықты толғандырып отырған азық-түлік бағасының өсуіне қатысты сыни пікір білдіріп, алдағы уақытта нақты шешімін табуды тапсырды.
«Халықтың табысын арттыру бағдарламасы қабылданды. Бірақ, оның жұртқа тигізіп жатқан пайдасы шамалы. Ең алдымен, жергілікті жерлерде тиімді жұмыс жүргізілуі керек. Әкімдер жыл сайын әрбір 10 мың тұрғынға 100 жаңа жұмыс орнын ашуға тиіс. Менің білуімше, бұл бағытта нақты нәтиже жоқ. Тағы да ескертемін. Өңір басшыларының жұмысын бағалаған кезде осы көрсеткішке баса мән береміз. Жұмыс орындарын ашу жұрттың әлеуметтік жағдайына тікелей әсер етеді. Экономиканың тұрақты дамуы да осыған байланысты. Сондықтан Үкімет әкімдермен бірлесіп, бұл міндеттің қалай орындалып жатқанын талдауға тиіс», – деді Президент.
Қорытынды сөзінде Қасым-Жомарт Кемелұлы биылғы жылы күз мезгілінде үкімет мүшелері арасында кадрлық шешімдер қабылдайтынын айтып, жалпы үкімет жұмысына орташа деген баға берді.
Қуат Байғоджаев,
Аудандық партия филиалының атқарушы хатшысы,
Фракция жетекшісі.