Өткен аптада облыстық мәслихаттың депутаты, тұрғын үй-коммуналдық шаруашылық және құрылыс мәселелері жөніндегі тұрақты комиссияның төрағасы Бағдәулет Үстенов ауданымызға іс-сапармен келді. Аудандық әкімдіктің кіші мәжіліс залында облыстық мәслихат депутаты Ерік Абитов, Есік қаласы әкімінің орынбасары Марлен Мұратов және аудандық тұрғын үй-коммуналдық шаруашылығы, жолаушылар көлігі, автомобиль жолдары және тұрғын үй инспекциясы бөлімі мамандарымен дөңгелек үстел өткізді.

Күз мезгілінде жылыту маусымына қызу дайындық басталып, тұрғындардың әлекке түсетіні белгілі. Бағдәулет Нығметбекұлы осы мәселе бойынша бірқатар мәліметтер алды. Облыстық мәслихат депутаты өз кезегінде:

– Бүгінгі таңда халық пен билік арасындағы байланыс үзіліп бара жатқан секілді. Сондықтан, бұл олқылықтың орнын толтырып, тұрғындармен байланысты нығайтып, жұртшылықпен бірге жұмыс жасауымыз қажет. Әкімдіктегі қызметкерлер халықтың шағымын жедел мәслихат депутаттарына жеткізіп отырса, мәселелердің шешім табуы жылдам болар еді, – деп алдағы уақыттағы қызмет барысына оң қадамдар жасаудың маңыздылығына тоқталды.

Өз кезегінде Марлен Мұратов:

– Қазіргі уақытта Есік қаласының 51 пайызы ғана табиғи газбен қамтамасыз етілді. Бұл ретте мердігер компаниялар өз мәселелерін алға тартады. Әзірге жоспарға сәйкес жұмыстары орындалған жоқ. Дегенмен жылыту маусымына дайындық қарқынды жүзеге асуда. Жергілікті тұрғындармен тығыз қарым-қатынастамыз, – деді.

Дөңгелек үстел барысында Бағдәулет Нығметбекұлы мен Ерік Әзілжанұлы Есік қаласындағы бірқатар мәселелермен танысып, соған сәйкес атқарылатын шараларды, өздеріне әрі мемлекеттік қызметкерлерге артылған міндеттерді жоспарлады.

Ринат НАРХАНОВ.