2 қыркүйек күні Еңбекшіқазақ аудандық мәслихатының аудандық сессиясы өтті. Оған облыс әкімі Марат Сұлтанғазиев қатысты. Аудандық әкімшіліктің кіші залында өткен жиынға аудандық 25 депутаттың 23-і қатысты.
Сессияны жүргізген аудандық мәслихат хатшысы Бекет Ахметов күн тәртібімен таныстырып, облыс әкімі Марат Сұлтанғазиевке сөз ұсынды.
Өз кезегінде облыс әкімі ҚР жергілікті мемлекеттік басқару және өзін-өзі басқару заңына сәйкес Еңбекшіқазақ ауданының әкімі лауазымына Алтай Досымбаевты ұсынды.
– Ауданымыздың тумасы Алтай Машикұлының өмір жолы да, атқарушы биліктегі істеген жұмыстары да жұртшылыққа кеңінен таныс. Туған жерге ту тігіп, қабілет-қарымын жан-жақты көрсетіп келеді. 10 жылдан астам уақыттан бері Еңбекшіқазақ ауданы әкімінің орынбасары. Әлеуметтік-экономикалық саладағы міндеттердің талапқа сай жүзеге асуына өз үлесін қосуда. Білімі мен білігі, іскерлігі, жинаған мол тәжірибесі қоғам дамуына септігін тигізері анық, – дей келе Марат Елеусізұлы кандидатқа қатысты ойын ортаға салып, негізгі шешімді мәслихат депутаттарының еншісіне қалдырды.
Ұсынысты мәслихат депутаттары бірауыздан қолдады. Халық қалаулыларының сеніміне ие болған Алтай Досымбаевты аймақ басшысы Еңбекшіқазақ ауданының әкімі етіп тағайындады. Бұдан кейін үлкен мәжіліс залында аудан активіне жаңа басшыны таныстыру рәсімі өтті.
Бүгінгі таңдағы сындарлы уақыттың талабы мен жүгі ауыр. Демократияға батыл қадам басқан еліміз үшін іскерлікті бұрынғыдан да ширата түсудің қажет екені белгілі. Жаңа әкімнен аудан жұрты игілік пен ізгілікті, тың ізденістерді күтетіні белгілі.
Облыс әкімі осы орайда ҚР Президенті Қасым-Жомарт Тоқаевтың қыркүйектегі жаңа Жолдауында айтылған міндеттерге тоқталды. Халықтың әл-ауқатын арттырудың өзекті мәселелерін атады. Саяси құжатта айтылған бес бағытты саралады. Оның ойдағыдай жүзеге асуы – ел сенімінен шығудың басты кепілі екенін сөз етті.
– Еңбекшіқазақ ауданы зор мүмкіндіктерге ие. Бұл өлкедегі аграрлық сала, өндіріс, туризм, бәрі – байлықтың көздері. Оны қат-қабат дамытудың негіздері жеткілікті. Адам ресурстары да аз емес, 300 мыңнан астам тұрғын бар. Сол себепті, жаңа әкім өзіне жүктелген міндетті лайықты атқарарына сенеміз, – деп Марат Сұлтанғазиев өз ойын жеткізді.
Өз кезегінде сөз алған Алтай Досымбаев өмір бойғы жиған тәжірибесін, күш-жігерін ауданымыздың өркендеуіне жұмсауға уәде етіп, сенім білдірген азаматтарға алғысын айтты.
Ринат НАРХАНОВ.
