2016 жылдың 1 қаңтарынан бастап елімізде жергілікті полиция қызметі құрылған болатын. Жергілікті полиция қызметінің негізгі міндеттері – қоғамдық тәртіпті күзету, көше және тұрмыстық деңгейдегі қылмыспен күрес, жол қауіпсіздігін қамтамасыз ету, құқық бұзушылықтың алдын алу және қоғамда ұсақ бұзақылыққа «мүлдем төзбеушілік» қағидасын қалыптастыру. Осы салада біздің ауданымыздағы атқарылған жұмыстармен танысу мақсатында Еңбекшіқазақ АПБ Жергілікті полиция бөлімінің басшысы, полиция подполковнигі Бағдат Жақыпбаевпен тілдестік.
Ауданымыз жер көлемі мен халық саны жағынан ауқымды болғандықтан, жергілікті полицияның да жұмысы қиындық пен күрделілікке толы екені белгілі. Подполковник Бағдат Еркінұлы 1 қазан мен 1 қараша аралығындағы аудан көлемінде атқарылған «Учаске» аталған Жедел профилактикалық іс-шараларға тоқталды. Тексерілген нәтижеге сүйенсек, 8358 көпқабатты, 38585 жеке үйлер тексеріліп, заңсыз жалға беріліп келген 19 пәтер анықталды. Бұдан бөлек 11010 саяжай үйлері, 1222 шаруашылық қожалықтары, 128 сауда үйлері тексерістен өтіп, тұрақты тұрағы жоқ 5 адам қабылдау орталығына жіберілгенін мәлімдеді.
– Заңды әрі заңсыз да қару ұстап жүрген азаматтардың бары жасырын емес. Қару бар жерде кез келген сәтте қауіп те бар. Нақты мәліметтерге жүгінетін болсақ, кейбір қылмыстық фактілердің туындауы да заңсыз қару сақтаудың зардабынан келеді. Аталған мәселе бойынша азаматтық айналымда тіркелген 3252 қару иелері тексерістен өткен, – дейді Б.Жақыпбаев.
Күздің соңғы айлары аңшылықтың белең алатын кезеңі болғандықтан, осы бағыттағы шараларды да мәлімдегенді жөн санадық.
– «Браконьер» Жедел профилактикалық іс-шара бойынша 20 қазан мен 19 қарашаға дейін аудан көлемінде заңсыз аң аулаумен күресу жұмыстары жүргізіліп жатыр. Қазіргі күнге дейін заңсыз аң аулағаны үшін 20 адамға әкімшілік хаттама толтырылды. Сондай-ақ, Шелек өңірінде Қызыл кітапқа енген жануарды үйінде ұстаған азаматтың үстінен қылмыстық іс қозғалды, – деді подполковник Б.Еркінұлы.
Жалпы, қазан мен қараша айларының аралығында 4336 адам әкімшілік жауапкершілікке тартылған.
Ринат НАРХАНОВ.
