Қыс мезгілінің аяғында еліміздің көптеген өңірлерін топан су басқаны туралы мәліметтердің көбейетіні қалыпты жағдайға айналғалы қашан. Түркістан облысы мен Жамбыл облысында орын алып жатқан төтенше жағдайларды естіп-көріп отырмыз. Қарапайым қарашаның судан келетін азапты тартуы қай-қайсымыздың да қабырғамызға батары сөзсіз. Келеңсіз жағдайлардың алдын алу үшін Еңбекшіқазақ ауданында да су тасқынына қарсы іс-шаралар жүргізілді.
Біздің ауданда күн жылына бастағанда айтарлықтай қауіптер бары жасырын емес. Себебі, қар қалың жауатыны өз алдына, сонымен қатар ауданымызда 57 тоған (пруд) мен су қоймалары бар. Олардың ең ірілері – 226,49 млн текше метр су көлемін құрайтын Бартоғай су қоймасы мен 2 млн текше метр су көлемін құрайтын Есік көлі екені мәлім.Осы орайда аудан әкімі Алтай Досумбаев Бәйдібек би, Тескенсу, Қазақстан ауылдық округтеріндегі су тасқыны қаупі бар учаскелерді аралады. Аталған орындардың жайымен танысқан аудан әкімі округ әкімдеріне қауіптің алдын алатын, атқаруға тиісті бірқатар жұмыстарды тапсырды. Сондай-ақ техника жағынан тапшылық болмайтынын жеткізді.
– Күннің күрт жылынуына байланысты қазіргі таңда қауіпті аймақтар қатаң бақылауға алынды. Одан бөлек аудандағы әрбір өзендердің жағасы мен көпірлерін мұз бен қардан тазарту жұмыстары жүргізіліп келеді. Аудан тұрғындары да өз аулаларын таза ұстағаны жөн, – деді А.Досумбаев.
Ринат НАРХАНОВ.