Сағындырып жеткен наурыз айының 14-ші жұлдызы баршаңыз білетіндей «Көрісу күні» мерекесі. Аталған мейрам соңғы жылдары халқымыздың жүрегінен ерекше орын алып, жыл сайын бүкіл еліміз бойынша айрықша мерекеленіп келеді. Бүгін Есік қаласындағы Т.Молдағалиев атындағы аудандық Мәдениет үйінің алаңында Қарасай, Жамбыл, Талғар және Еңбекшіқазақ аудандарының мәдениет өкілдері бірігіп «Амал» күнін кең ауқымда атап өтті.

Шараның басында «Амал» мерекесіне арналған үлкен сахналық көрініс көрсетіліп, аудан әкімі Алтай Досумбаевқа құттықтау сөз берілді. Аудан әкімі өз кезегінде:

– Бұл күнді халқымыз «Амал мерекесі» деп те атайды. Бұл – нағыз береке-бірлік пен ырыс-ынтымақтың мейрамы. Тазалық пен татулықтың, риясыз шаттық пен қуаныштың, ақ тілеу мен пәк пейілдің қосшысы. Ұлы Абай:

«Қырдағы ел ойдағы елмен араласып,

Күлімдесіп, көрісіп, құшақтасып» – деп жырлағандай қыс қыстауға, жаз жайлауға көшетін халық қардың көбесі сөгіліп, көктем шыққан уақытты жақсылыққа балап, бір-біріне жақсылық тілеуге асыққан - дей келе Амал мерекесінің мән-мағынасы мен қадір-қасиетіне кеңінен тоқталып қалың жұртшылықты айшықты мерекемен құттықтады.

Шара барысында Еңбекшіқазақ ауданының құрметті азаматы Аянбек Даутқұлов ағамызға да сөз кезегі берілді. Ел ағасы салт-дәстүрге бай халқымыздың даналығын тілге тиек етіп, ел бірлігі үшін «Көрісу күні» мерекесінің алар орнын айтып, барша жұртқа ақ тілегін білдірді.

Мереке 4 ауданнан жиналған сахна саңлақтарының концерттік бағдарламасымен жалғасты. «Адырна», «Сазген» фольклорлық-этнографиялық ансамблдерінің сазды әуендері, Қанат, Айткүл Құдайбергеновтардың елге танымал әндері, «Алтынай» МХБА мен «Алатау әуендері» концерттік ұйымының бишілері сынды көптеген өнерпаздардың мерекелік туындылары жиылған қауым көңілін тербей білді.

Ринат НАРХАНОВ.