Жер аяғы кеңіген жаздың жайма шуақ күнінде ұйымдастырылған жылы жүздесулердің бірі – А.Мәлкеев атындағы Есік мамандандырылған дарынды балаларға арналған «Білім-инновация» лицей-интернатын (ол кезде А.Мәлкеев атындағы мектеп интернаты деп аталған) 1972-1973 оқу жылын тәмамдаған түлектердің 50 жылдан соң кездесуі болды.

Кеш басында түлектер бір минут үнсіздікпен о дүниелік боп кеткен сыныптастарын еске алып, құран бағыштады. Марқұмдардың артында қалған ұрпақтарына ізгі тілектер айтылды. Ұлы Отан соғысы мен Ауған соғысында ерлікпен қаза тапқан батырлардың рухына тағзым етті. Одан соң түлектер өздері қанаттанып ұшқан білім ордасына жиналған «ғалым да, шахтер де бас иетін» ұлағатты ұстаздарына амандаса барып, өткен өмір белестерін шәкірттік сезіммен еске алды. Алтын ұядан жарты ғасыр бұрын түлеп ұшқан түлектердің әрқайсысы – әр түрлі мамандықты игеріп, еліміздің өркендеуіне үлес қосқан, өз ортасында абыройға ие болған еңбек ардагерлері. Осы жылғы түлектердің ең белсендісі – Ибрагим Кибиров. Ол ауданымыздың құрылыс саласына айтарлықтай жаңалық енгізіп, ел алдында азаматтық парызын өтеген нар тұлғалы азамат, құрыш қолды құрылысшы.

– Бәріміз де кеше ғана мектепті бітіріп, әрқайсымыз арман қуып әр қиырға кетіп едік. Уақыт деген жүйрік екен. Қызық, барлығы да өзгерген. Тіпті, кейбір қыздарды танымай да қалдым. Бірақ, мектептегі бейнелері санамда сақтаулы. Әрқайсының лақап аттары мен жасаған тентек істеріне дейін есімде. Бәрінен бұрын 50 жылдан кейін кездескеніміз қызық болды. Бұл өте жақсы үрдіс деп есептеймін. Өскелең ұрпаққа тәлім-тәрбиесі мол. Себебі, кейінгі түлектер де біз секілді кездесіп тұрса нұр үстіне нұр, – дейді Ибрагим Кибиров.

50 жылдан кейін ұшқан ұясымен қауышқан түлектер естелік ретінде мектеп ауласына ағаш отырғызып, гүл екті. Иә, 50 жылдан кейін кездесіп, ағынан жарылып, әңгіме айтқан аға-апайларымызға біз де шексіз риза болдық. «Адамның тәні қартайғанымен, жаны мәңгі жас» деген рас. Көңіл деген – көк дөнен. Әп-сәтте алыста қалған қимас кездерге алып ұшады. Өткені өнеге, тұла бойы тұнған ұлағат аға-апаларымызға тек жақсылық тілейміз.

Е.АСЫЛ.