«Дәрмен» әлеуметтік-оңалту орталығында ерекше қажеттілігі бар балаларға арнайы концерт ұйымдастырылды.
Р.Тоқатаев атындағы орта мектептің оқушылары аталған орталықтағы балдырғандарға концерт қойып, сый-сияпат жасады. Зердесі бұзылғанымен жанарында жалын оты жайнаған балдырғандар өнерпаз оқу-шылармен бірге ән салып, биге басып, ішкі әлемінде бұлқынып жатқан сезімінің жетегіне ерді. Ал Р.Тоқатаев атындағы орта мектептің психологтары да мүмкіндігі шектеулі балдырғандарға жақсы көңіл-күй сыйлау үшін мәдени шаралардың маңыздылығын тілдеріне тиек етті. Саяжай маңында орналасқан «Дәрмен» әлеуметтік-оңалту орталығы биылғы жылдың сәуір айынан мүмкіндігі шектеулі балаларға қызмет етіп келеді. Бүгінде аталған орталықта педиатр, ортопед-травматолог, реабилитолог, психолог, невропатолог, логопед, дефектолог, музыка, және басқа мамандар еңбек етіп келеді. Онда 3 жас пен 18 жас аралығындағы 40 жасөспірімге кезекпен белгіленген мерзімге оңалту шаралары жасалады. Олар кешендегі жатын бөлмесіне қимылдау қабілетіне, психологиялық жағдайына қарай орналастырылады. Оларға орталықтағы арнайы мамандардан басқа тәрбиешілер де қызмет етеді. Балаларға 3 уақыт тамақ беріліп, күні бойы ем алады.Балдырғандардың бала жүрегін қуанту үшін орталықта түрлі рухани шаралары жиі ұйымдастырылып келеді.
Е.АСЫЛ.
