Қазақстан ауылындағы Ж.Қайыпов атындағы орта мектепте «Білім көзі – кітапта» тақырыбында «Жаратылыстану» пәндер  апталығы  аясында ерекше іс-шара өтті. Мақсат – оқушылардың ғылымға деген қызығушылығын ояту және сапалы әдебиеттің маңыздылығын түсіндіру.

Шараны георафия пәнінің мұғалімі Гүлнара Абубакірова ұйымдастырып, жүргізді. Кездесуде мектеп директоры Алия Азнабакиева келген қонақтарға өз алғысын білдіріп, алдағы істеріне сәттілік тіледі. Бұл жолғы кездесудің басты қонақтары – жаратылыстану-математика бағытындағы оқулықтар мен ғылыми-танымдық еңбектердің авторлары болды. Атап айтсақ, Абай атындағы мемлекеттік университетінің ұстаздары Салтанат Әбілмәжінова, Абдиманапов Бахадурхан.

Кездесу барысында авторлар оқушыларға күрделі формулалар мен теориялардың артында қандай қызықты оқиғалар жатқанын айтып берді. Әсіресе, химия және биология, география саласындағы жаңалықтардың кітап бетіне қалай түсетіні туралы әңгіме оқушыларды ерекше қызықтырды. 

«Кітап – бұл жай ғана ақпарат көзі емес, ол – ғалымның көпжылдық тәжірибесі мен ізденісінің жемісі. Жаратылыстануды сүю үшін алдымен оны түсіну керек, ал түсіну кітаптан басталады», – деп атап өтті қонақтардың бірі. Іс-шара еркін форматтағы сұрақ-жауап түрінде өтті. Оқушылар өздерінің көкейлерінде жүрген маңызды мәселелерді талқылап, пікір алмасты.

Кездесу соңында ауыл ақсақалы, ауыл шаруашылығына еңбегі сіңген Алпысбай Ақылбекұлының «Байырғы қазақтың болмысы, тыныс-тіршілігі» атты кітаптың тұсауы кесіліп, оқырмандарға таратылды.  Бұл кездесу оқушылар үшін тек білім алмасу ғана емес, сонымен қатар үлкен мотивация болды. Енді мектеп дәліздерінде «Кітап – білім бұлағы» деген сөз жай ұран емес, әр оқушының іс-әрекетіне айналары сөзсіз.

Нұргүл САБАҚАНОВА,

тарих пәнінің мұғалімі