Жуырда Әймен орта мектебінде тарих пен дәстүрге тағзым ететін ерекше шара өтті. Мектепте Әймен батыр атындағы арнайы мұражай бөлмесінің ашылу салтанаты ұйымдастырылып, лентасы қиылды. Шараға Бөлек ауылдық округінің әкімі Дулат Қасымшалов, ауылдың үлкендері, мектепте ұстаздық еткен зейнеткерлер және түлектер қатысты.

Мұражай кабинетінде мектептің тарихы, өткен жылдардағы басшылар, «Алтын белгіге» бітірген түлектер жайлы ақпарат ұсынылды. Сонымен қатар, директор Ақмарал Есенбаева Әймен батыр туралы өмірі мен ерліктері туралы деректерді бөлісті. Дегенмен де батыр туралы бізге жеткен деректер тым аз екенін тілге тиек етті. Айтуынша, Әймен батыр Байтемірұлы Шапырашты-Теке елінен шыққан, атақты Дәулетбай бабаның Рысбайдан туған немересі. Байтемірдің бірінші әйелі қалмақ қызы Жырғалы болса, екінші әйелі Коянкөзді Таутүрген ауылына келін етіп алады. Жырғалыдан бес ұл, Коянкөзден екі ұл тарайды, олардың ішінде Әймен мен Еркебай есімдері айқын белгіленген. Әймен батырдың анасы Коянкөздің азан шақырып қойған есімі Айнамкез болып, ақылдылығымен, емшілігімен елге танымал болған.

Ақмарал Жақашева атап өткендей, Әймен батыр Ақтабан шұбырындыдан кейін ел қорғау жолында Іле өзенінің сол жағалауын жаудан азат етуге атсалысқан. Кейбір деректерге сәйкес, ол 25 жасында қайтыс болған және деректер бойынша ұрпағы болмаған. Мектеп мұражайында осы мәліметтерге сүйене отырып, батырдың өмірі мен ерліктері қонақтарға таныстырылды.

Мектептің мәжіліс залында оқушылардың өнері тамашаланды. Зейнеткер ұстаздар естеліктерімен бөлісіп, мектебіне деген сүйіспеншілігін білдірді, оларға шапан жабылды. Сонымен қатар мектеп түлектері де сөз алып, жылы лебіздерін жеткізіп, мектепке үлкен теледидар сыйлады.

Мұражайдың ашылуы мен концерттік бағдарлама ауыл тарихына, Әймен батырдың ерлігін дәріптеуге, мектепке деген сүйіспеншілікті арттыруға бағытталған маңызды шара ретінде есте қалды.

Ринат НАРХАНОВ.