Бүгін республикалық референдумға өңірдегі ең ірі агроөнеркәсіптік кәсіпорындардың бірі – «Адал» агроөнеркәсіптік компаниясы» АҚ қызметкерлері де қатысты. Олар дауыс беруге ұжым болып келді.
Айта кету керек, Еңбекшіқазақ ауданындағы өнеркәсіп өндірісінің ең үлкен бөлігі – өнімнің 90 пайыздан астамы агроөнеркәсіптік кешенге тиесілі. Облыстың тауарлық өндірісінде аудан сүт өндіру және оны өңдеу бойынша жетекші орындардың бірін алады. Бұл көрсеткіштің негізгі үлесін сүт өнімдерін шығаратын «Адал» агроөнеркәсіптік компаниясы қалыптастырып отыр.

Бұл кәсіпорында өз ісіне адал жандар еңбек етеді. Олар үшін ең бастысы – ертеңгі күнге деген сенім.

– Өндірушілерді қолдауға бағытталған мемлекеттік бағдарламаларды іске асыру – агроөнеркәсіп секторын дамытудың нақты құралы. Біз үшін мемлекеттің тұрақты болуы өте маңызды, өйткені дәл осындай жағдайда ғана біз тыныш жұмыс істеп, компаниямызды дамытуға мүмкіндік аламыз. Тек тұрақтылық бар жерде ұзақ мерзімді стратегия қалыптасып, жаңа жұмыс орындары ашылады.
Бүгінгі референдумға қатысу – біздің азаматтық ұстанымымызды білдірудің мүмкіндігі. Кәсіпорынның өндірістік процесінде әрбір буын мен әрбір қызметкердің еңбегі маңызды болғаны сияқты, референдумда да әр адамның дауысы елдің болашағын айқындайды. Біз күн сайын белгіленген талаптардың сақталуы түпкі нәтижеге қалай әсер ететінін көріп жүрміз, сондықтан шешімдерді де бірге қабылдаймыз. Біздің ұжым үшін референдум – жай ғана рәсім емес, саналы таңдау. Өйткені тұрақтылық пен даму жалпы мемлекеттік үдерістермен тікелей байланысты, – дейді компания қызметкерлері.

«Адал» агроөнеркәсіптік компаниясының ұжымы референдумды бір ауыздан қолдап, Қазақстанның ұзақ мерзімді даму перспективаларына сенім білдірді. Бүгінде кәсіпорында өндірістік қуатты кеңейтуге және тиімділікті арттыруға бағытталған ауқымды инвестициялық жобалар жүзеге асырылып жатыр. Мұнда агроөнеркәсіптік кешеннің стратегиялық маңызы жақсы түсініледі, себебі ол өңір мен жалпы елдің азық-түлік қауіпсіздігі мен тұрақты дамуына тікелей ықпал етеді.