Өмір екі қайтара берілмейтін ғажайып екендігін психологиялық және дін тұрғысынан жастар санасына берік орнату мақсатында өткен жиынға колледж ұстаздарымен қатар студенттер, психолог мамандар мен қала мешітінің бас имамы Хазірет Рәтбек қажы Нысанбайұлы қатысты.

Бүгінде суицид жастар арасында көбейіп кеткенін көлденең тартты психологтар. Дінге немесе арнайы мамандарға, ата-анасына басындағы проблеманы айтудан қашқан, сөйтіп қыл арқанға қылқынып немесе у өзегін өртеп өмірден өткен жастар саны жыл санап арту үстінде. Осылай еліміз өз-өзін өлтіргендер саны жағынан көш ілгері тұр әлемде. Мұның себебін рухани құлдырау деп түсіндірген психолог мамандар Қарлығаш Исенбаева, Баян Балташева және Клара Қалжанова жастар қауымына осы тақырыпты қамтыған баяндамалар оқыды.

Колледж директоры Гүлнар Жошыбаева жастарды иман дейтін игі құндылықты берік ұстануға шақырса, Хазірет Рәтбек қажы Нысанбайұлы қазақтың қызы мен ұлы қашан да қастерлі ұғымдар екендігін айтты. Сондай-ақ, ар мен ұят, отансүйгіштік, үлкенге құрмет, кішіге ізет дейтін ізгіліктерді дәріптеуге үндеді. Өзін-өзі өлтіру – дін Ислам ұстанымдарында кешірілмес күнә екендігін жеткізді.

Ә.МАНАСБЕК