Қазіргі қысылтаяң уақытта табысынан айырылып, бірді-бірге жеткізе алмай отырған отбасылар баршылық. Әсіресе, бұл жағдай – көпбалалы, әлеуметтік жағдайы онсыз да төмен отбасылар үшін үлкен соққы. Мұндайда көмек қолын созып, барымен бөлісудің өзі – ерлікке пара-пар әрекет.

         Біріксек, біз алмайтын қамал жоқ деген Қызылжар ауылының тұрғындары Көктөбе ауылдық округінің әкім аппаратымен және «Nur Otan» партиясымен бірлесе отырып, көмекке мұқтаж жандарға қол ұшын берді. Ауыл азаматтары – Жанәділ Шалағызовтың бастамасымен Ұлан Тулубаев, және Ермек Нұрланұлы қазақы дәстүрмен үй-үйді аралап, жылу жинады. Тұрғындар қолдан келгенінше көмегін көрсетіп, бірі ақшалай, енді бірі азық-түлік беріп, береке-бірлігін танытты. Жиналған қаражатқа 41 отбасына азық-түлік алып, тапсырылды.

         Сол сияқты ерлі-зайыптылар – Төребай Сақтағанбаев пен Жадыра Жаркенованы да оқырмандарымызға мысал еткіміз келеді. «Жақсының жақсылығын айт, нұры тасысын» демей ме қазақ?! Рахат ауылдық округіне қарасты Бәйтерек саяжайының тұрғындары Төребаевтар өз қалталарынан ақша шығарып, карантинге жабылған көршілес саяжай тұрғындарына екі күн бойы азық-түлік тасып, көпке үлгі болды. Әлеуметтік жағдайы төмен отбасыларына керек-жарағын алып, қолдан келген көмегін аямады. Көршілерінің бұл әрекетіне тәнті болған Лейля Дуненбаева редакциямызға хабарласып, «Мұндай қайырымдылық шаралары біріксек, біздің қолымыздан бәрінің келетінін көрсетіп отыр. Әрі қазіргі жағдайдан жабырқап қалған көңілге демеу беріп, жігерлендіреді», – деп өз ойымен бөлісті.

Әрине, мұндай кезеңде бір жағадан бас, бір жеңнен қол шығарып, біріге білген ел ғана жеңе алады. Ендеше, бір-бірімізге демеу болып, көмегімізді аямайық, ағайын.

Құралай МҰРАТҚЫЗЫ