Сөгеті ауылының кең сарай – мәдениет үйінде жиналған жұртшылықты әуелі ауылдың өмір тынысы: балалардың шыбық мініп шапқылап, асық ойнаған, апа-әжелердің жүн сабап, ұршық иіріп, текемет басқан, қыз-келіншектердің күбі пісіп, қазан көтерген, ақсақалдардың ақылға қонымды әңгіме айтып, жастарға бата берген шынайы сахналық көрінісін тамашалаудан салтанатты жиынды бастап, сағыныштың «сары майынан» «дәм» татыруы да сондықтан.
Сөгеті селолық округінің әкімі Айтжан Қашағанов ауылдың елу жылдық тарихын баяндап, бүгінгі тыныс-тірлік жайлы кеңінен сөз қозғады. Аудандық мәслихат хатшысы Ә.Талқанбаев бабалардың ізі қалған, Қыдыр қонған киелі жерді тірлік дүбіріне бөлеп, оның ел болып өркендеуіне бар өмірін сарп еткен ауылға марқұм Сағыныш Есбергеновтың атын беріп, мәдениет үйінің ауласына ескерткіш орнату – туған жерге туын тіккен азаматқа әбден лайық екенін түйіндеп айтты. Сөгетіліктерді қуаныштарымен құттықтап Әділбай Айнабекұлы бір топ азаматтарды аудан әкімінің құрмет грамотасы, алғыс хатымен және ауылдың көркеюіне қашанда қол ұшын беріп, демеуші болып жүретін екі кәсіпкерді «Жомарт жүрек» төсбелгісімен марапаттады. Сағыныш ағаның жұбайы Әйкен апай құлазыған ен далада кеңшар құрған кездегі бейнетті тірлікті тебірене еске алды. Ауданның ардақты ардагерлері Т.Ұзақов, Е.Сұлтанғазиев, А. Дауытқұлов, бұрын осы ауылда партком хатшысы болған С.Нұрбекұлы кеңшар құрылған жылдардағы естен кетпес оқиғаларды еске алып, ауыл атын С.Есбергенов деп атау-ды, марқұмға бюст орнату ұсынысын қолдап, көпшілікті бұл мәселеге бір кісідей атсалысуға шақырды. Сөгетіліктер де орынды ұсынысты қолдап, қол соқты.
Сөгетінің танымал түлегі, журналист Сүлеймен Мәмет туған жері туралы толғана сөз сөйлеп, кейінгі ұрпақтың білімді болып өсуіне ықпал етуде мектептегі екі оқушыға және бір мұғалімге өз қаржысынан стипендия тағайындайтынын жариялап, оқу орнын тірек мектебіне айналдыруға, интернаттан Тұманбай Молдағалиев атындағы үйірме ашуға шақырды ауылдастарын. Республикалық, облыстық білім беру саласында қызмет атқаратын сөгетілік түлектер О.Жандосов атындағы мектептің бір топ мұғалімдерін ҚР Ғылым және білім министрлігінің, ал Салтанат Беспаева аудандық білім бөлімінің құрмет грамотасымен марапаттады. Қайта жаңарған мешіт пен Сүлеймен Мәмет өз кітап қорынан бөлген мектептегі жаңа кітапхананың ленталары қиылып, салтанатты түрде ашылды. С.Есбергеновтің мұражайын аралап, ауыл туралы мағлұматтармен танысты жиналған қауым. Ауылға ат басын арнайы бұрған құтты қонақтар еліміздің еңбек сіңірген танымал әншілері Нұрғали Нүсіпжанов пен Талғат Күзембаев құлақ құрышын қандыратын әуезді әндерімен тойға шашу шашты. Қонақтарға шапан кигізді. Жұртшылықты дастархан басына жинап, ас берілді. Той қазақша күрес, көкпар тарту, аламан бәйге жарысымен де көрермендер көңілінен шықты. Қызыққа толы тартысты спорт ойындарын күні бойы тамашалаған көпшілік көңілдері марқайып тарасты.
Анарбек МӨКІШҰЛЫ.
