Аудандық статистика басқармасында  2003 жылдан бері аянбей еңбек етіп, ағымдағы жылдың маусым айынан бастап басшылық қызметте отырған Алуа Елеусізова да бұл тұжырымымызды мақұлдар. Себебі, дәл айдың басынан басталатын есеппен әуре болып отырғанында біз де есігін қақтық Алуа Серікқызының. Мақсатымыз – тұрғындарды аудан статистикасымен аз-кем таныстыру.  «Әр айдың бірінен бастап, ай сайын түрлі есеп жинаймыз. Жүргізуші маманымыз демография бойынша барлық есепті жинайды. Каталогпен тіркеп отырамыз, әрбіріне код беріледі. Онда өлім, туылу, қосылу,  ажырасу туралы акт жазбаларының есебі жүргізіледі» – деп әңгімесін бастаған статистика басқармасының басшысы Алуа Серікқызы биылғы жыл сала мамандары үшін атаулы екенін жеткізді. «8 қарашада статистиканың құрылғанына 95 жыл толады.  1920 жылдың 8 қарашасында Қазақ Автономиялық Кеңестік Социалистік Республикасының Үкіметі  өзінің  қаулысымен «Қазақ АКСР мемлекеттік статистикасы туралы  ережесін» бекітіп, сол негізде Қазақ АКСР Статистикалық басқармасы құрылды. Осылайша, Қазақстанның орталық статистикалық органының құрылған күні 1920 жылдың 8 қарашасы деп есептеледі. Биылғы жылы 95 жылдық мерейтойымыз тойланбақ.  Статистика – бұқаралық әлеуметтік-экономикалық құбылыстар мен үдерістердің сандық және сапалық көрсеткіштерін зерделейтін ғылым, қоғам өмірінің (экономиканың, саясаттың, т.б.) сандық заңдылықтарын, олардың сапалық мазмұнымен ажырағысыз байланыста сипаттайтын статистикалық ақпаратты жинап, өңдеуді, талдау мен жариялауды қамтитын қызмет саласы. Статистиканың басты функциясы – ақпаратпен жабдықтау. Қазіргі таңда статистикалық есептерді тапсыру оңтайландырылып, «Онлайн жүйесінде» есеп беру оң шешімін тапқан. Яғни, кеңседен шықпай-ақ есептерді тапсыруға болады. Селолық округтерде статистикалық мәліметтер «Шаруашылық есеп кітабы» және «Шаруа қожалықтарының есеп кітабы» негізінде жинақталады. Мәліметтердің нақтылығына селолық округ әкімдері тікелей жауапты тұлға болып табылады. Кез-келген салада бір нақты сан айтпастан бұрын статистиканың берген мәліметіне жүгінеді. Сондықтан жұмысымыз өте жауапты» – деп мамандығының маңызы мен тарихына да тоқталып өтті басқарма басшысы.

Жауапты қызметтің жүгін тек өз ісіне жауапты қызметкерлер ғана арқалай алары сөзсіз. басқармасындағы мамандар жайына тоқталып өтуді өтіндік Алуа Елеусізовадан. «Негізі, аудандық статистика басқармасында штаттық кестеге сәйкес 10 маман болуы керек. Бүгінгі  таңда  5 маман, 2 оператор қызмет етуде. Оның екеуі Шелек өңірінде, төртеуі Есік өңірінде статистикалық есептерді жинап, өңдейді. Бос орындардың себебі: 3 маман бала күтімінде, 1 орын бос.  Бос орындарға заңға сәйкес конкурс жарияланды, өкінішке қарай ниет білдірушілер жоқ болып отыр.  Қай салада болмасын сапалы кадр мәселесі өршіп тұрғаны жасырын емес бүгінгі күні. Жай ғана жоғары оқу орнын бітіру аздық етеді, сол таңдаған мамандығыңды қызығушылықпен, сүйсіне орындау – нағыз қызметкердің ұстанымы. Бізде де ондай мамандар баршылық. Мысалы, Шелек өңірі бойынша барлық есептерді жинап, өңдеп отырған Айша Рахманова апайымыз 30 жылдан бері осы салада қалтқысыз қызмет атқарып келеді. Әрі артынан ерген жастарға да мамандықтың қыр-сырын ұғындырып, оларды тәрбиелеуде. Ал, Ж.Теміржанова, Т.Омаров сынды қызметкерлердің еңбек өтілі – 12 жылдан. Сонымен қатар, жас мамандарымыз да бар. Олар: Н.Шәріпов, А.Ғазезов».

Міне, құрметті оқырман, аудандық статистика басқармасымен де таныс болдыңыздар. Ендеше, сала мамандарын алда келе жатқан 95 жылдық мерейтойларымен құттықтап, жұмыстарына табыс, жоғарғы көрсеткіштер тілейік. 

Алмагүл НҰҒМАН.